Atyraý kóshelerinen 40 myń tekshe metr jańbyr sýy soryldy

ATYRAÝ. QazAqparat – Atyraýda 8 mamyrda bastalǵan jańbyr búgin tańerteńge deıin tolassyz jaýdy. Qala kóshelerinen jańbyrdan keıin 40 myń tekshe metr sý soryldy, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys tobynan málim etkendeı, Atyraý qalasynyń aýmaǵynda nóser jańbyrdan 36 mm ylǵal túsken. Bul – aılyq normadan artyq.

Saldarynan shahardaǵy jeke turǵyn úıler men ortalyq kóshelerde sý jınalyp qalǵan. Túngi mezgilde eki úıdi sý basqan.

«Atyraý qalasynda jaýǵan jańbyr kóshelerde sýdyń mol jınalýyna sebep boldy. Osyǵan baılanysty qalalyq ákimdikke turǵyndardan ótinish kóptep tústi. Turǵyndardyń ótinishine sáıkes, 9 mamyrda kósheler men aýlalarda jınalǵan sýdy sorý jumysy bastaldy. Osy maqsatta «Arnaýlyavtobaza» JShS men «Atyraý oblysy Sý Arnasy» KMK tarapynan 54 vakýým kóligi shyǵaryldy. Bul jumysqa 78 adam jumyldy. Kesheden beri qala kóshelerinen 40 myń tekshe metr sý soryldy. Nóser jańbyrdyń sýyn sorýǵa jeke ıeliktegi vakýým kólikteri de tartyldy»

, - dep habarlady qalalyq ákimdiktiń baspasóz qyzmeti.

Ákimdiktiń aqparatyna qaraǵanda, ortalyq kóshelerden bólek, sý basý qaýpi joǵary jeke turǵyn úılerdiń aýlasynan sý sorýǵa meılinshe nazar aýdarylyp otyr.

«Arnaýlyavtobaza» JShS-niń dırektory Almas Іztileýoviń málimetine súıensek, jańbyr sýyn sorý eki aýysymmen júrgilizilip jatyr. Bul jumys túngi mezgilde de jalǵasyn tabady.

Eske sala ketelik, budan buryn Atyraý oblysynda jolaýshylar avtobýsy sýǵa túsip ketkenin habarlaǵan bolatynbyz.