Atyraý qalasynyń mańynda balyq qyryldy
Balyq qyrylǵany týraly áleýmettik jelide vıdeo tarady.
Osyǵan baılanysty Atyraý oblystyq balyq sharýashylyǵy basqarmasynyń basshysy Artýr Sádibekuly túsinik berdi.
«Vıdeo bıyl túsirilgen. Biraq, qyrylǵan balyq dabyl qaǵatyndaı kóp emes. Naqty sany qosymsha habarlanady. Bul jaǵdaı Atyraý qalasynyń mańyndaǵy Qaıyrshaqty aýyldyq okrýgine qarasty «Bezymıannyı» sý aıdynynda bolǵan», -deıdi basqarma basshysy Artýr Sádibekuly.
Óńirlik kommýnıkatsııalar qyzmetiniń aqparatyna súıensek, balyqtyń qyrylýyna baılanysty arnaıy komıssııa qurylǵan.
Onyń quramynda oblys ákiminiń orynbasary Qaırat Nurlybaev, oblystyq balyq sharýashylyǵy basqarmasynyń basshysy Artýr Sádibekuly, orman sharýashylyǵy jáne janýarlar dúnıesi aýmaqtyq ınspektsııasynyń ókilderi bar.
Máseleniń mán-jaıy tekserilip jatyr.
Eske sala ketelik, budan buryn Atyraý turǵyndary Jaıyq ózeninen maıshabaqty súzip alyp jatqanyn habarlaǵan edik.