Atyraý qalasyndaǵy 194 kóshege jaryq ornatylady
14:10, 14 Aqpan 2018
ATYRAÝ. QazAqparat - Atyraý qalasyndaǵy 194 kóshege jaryq ornatylady. Bul týraly qala ákimi Serik Shapkenov turǵyndarǵa esep berý kezdesýinde málim etti, dep habarlaıdy QazAqparat Óńirlik kommýnıkatsııalar qyzmetine silteme jasap.
Elbasynyń joldaýyndaǵy «Aqyldy qala» tujyrymdamasyn júzege asyrý úshin, Atyraý qalasynda birqatar jobalar qolǵa alynýda.
2018-19 jyldar aralyǵynda Atyraý qalasynda uzyndyǵy 187 shaqyrym bolatyn 194 kóshege jaryq ornatý josparlanýda. Búgingi kúnde osy jobany iske asyrý úshin ınvestorlarmen jumys jasalyp jatyr.
Atap aıtqanda, 2017 jyly memlekettik-jekeshelik áriptestik negizinde jalpy uzyndyǵy 160 shaqyrym bolatyn 39 kóshege zamanaýı dıodty jaryqtandyrý júıelerin salý jumystary júrgizilýde.
Búginde 19 kóshedegi jaryq shamdary iske qosyldy. Qalǵan 20 kóshedegi jaryq shamdary bıyl paıdalanýǵa beriledi.