Atyraý qalasynda qarasora plantatsııasy tabyldy

ATYRAÝ. QazAqparat – Atyraý oblysynyń ortalyǵy Atyraý qalasyna irgeles ornalasqan Erkinqala aýylynyń turǵyny úıiniń aýlasyna 1898 túp esirtki shóbin zańsyz ósirgen. Oǵan baılanysty sotqa deıingi tergep-tekserý is-sharalary júrgizilýde, dep habarlaıdy QazAqparat tilshisi.

Atyraý oblystyq polıtsııa departamenti baspasóz qyzmetiniń málimetine qaraǵanda, qazirgi tańda óńir aýmaǵynda «Qarasora» aldyn alý is-sharasy ótkizilip jatyr. Osy shara barysynda Atyraý qalasynyń mańynda ornalasqan Erkinqala aýylynda turǵynnyń úıiniń aýlasynan 1898 túp esirtki shóbi sanalatyn qarasorany zańsyz ósirgeni anyqtalǵan.

«Tekserý júrgizgen polıtseıler buǵan qosa keptirilgen qarasorany da onyń aýlasynan tapqan. Saraptama qorytyndysyna sáıkes, kepken qarasoranyń salmaǵy 1 kılogramm 25 gramdy quraǵan.

Qazirgi ýaqytta Qazaqstan Respýblıkasynyń Qylmystyq Kodeksiniń 300-i baby (Quramynda esirtki zattar bar, ósirýge tyıym salynǵan ósimdikterdi zańsyz egip-ósirý) jáne 296-i babymen (Esirtki jáne psıhotroptyq zattaryn, sol tektestermen ótkizý maqsatymen zańsyz jumys isteý) sotqa deıingi tergeý-tekserý júrgizilýde», - dedi oblystyq polıtsııa departamenti bastyǵynyń orynbasary Nurhat Orazbaev.

Eske sala ketelik, budan buryn Atyraý turǵyny aýlasyna qarasora ósirgeni anyqtalǵan bolatyn.

«Atyraý qalasynyń mańyndaǵy Hımıkter poselkesiniń turǵyny úıiniń aýlasynda quramynda esirtki zattary bar ósimdiktiń tórt túbin ósirgen. Polıtsııa qyzmetkerleri aýlany tekserý kezinde zańsyz ósirilgen esirtki shóbin tapty. Qazir atalǵan derek boıynsha QR Qylmystyq kodeksiniń 300-babynyń 1-bóligimen (quramynda esirtki zattar bar, ósirýge tyıym salynǵan ósimdikterdi zańsyz egip-ósirý) sotqa deıingi tergep-tekserý amaldary júrgizilýde», - dep habarlaǵan bolatyn sol kezde Atyraý oblystyq Polıtsııa departamentiniń baspasóz qyzmetinen.

Toqtala ketetin jaıt, bıylǵy jyldyń 1 maýsym men 31 qazan aılary aralyǵynda Atyraý oblysy aýmaǵynda «Qarasora-2020» jedel profılaktıkalyq is-sharasy ótkizilip jatyr. Onyń negizgi maqsaty – esirtki jáne psıhotroptyq zattardyń zańsyz aınalymyn anyqtap, jabaıy qarasoranyń zańsyz saýdasyna tosqaýyl qoıý.

Al osydan bir aı buryn, naqtyraq aıtqanda 27 shilde kúni Qazaqstan Respýblıkasynyń Ulttyq qaýipsizdik komıtetiniń ókilderi Almaty qalasynda zerthana jaǵdaıynda sıntetıkalyq esirtki óndirisin uıymdastyrǵan Qazaqstannyń eki azamatyn ustady. Bul QR UQK el tarıhyndaǵy eń iri esirtki zerthanasyn uıymdastyrǵandar bolyp otyr.