Atyraý halyqaralyq áýejaıyna Hıýaz Dospanovanyń esimi berildi

ATYRAÝ. QazAqparat – Jeńistiń 75 jyldyǵy qarsańynda Atyraý halyqaralyq áýejaıyna aty ańyzǵa aınalǵan ushqysh, Qazaqstannyń halyq qaharmany Hıaýaz Dospanovanyń esimi berildi, dep habarlaıdy QazAqparat.

«Alty mınıstrlikten ruqsat aldyq. Áýejaıǵa qazaqtyń batyr qyzy Hıýaz Dospanovanyń esimin berý úshin respýblıkalyq onomastıkalyq komıssııa resmı sheshim qabyldady», - dep málim etti oblystyq tilderdi damytý basqarmasy onomastıka bóliminiń basshysy Jemis Dııasheva.

Hıýaz Qaıyrqyzy Dospanova 1922 jyly 15 mamyrda Atyraý oblysynda dúnıege kelgen. Ekinshi dúnıejúzilik soǵystyń ardageri, ushqysh, shtýrman-atqysh, Halyq qaharmany. 1940 jyly Oraldaǵy №1 orta mektebin úzdik bitirgen. Ushqyshtyq ómir jolyn Oral aeroklýbynda bastap, keıin soǵysqa attanady. Hıýaz Dospanova sol kezdiń ózinde teńdessiz erligi úshin «qanatty qyz» atanǵan.

Hıýaz qyzmet etken polk Soltústik Kavkaz, Kýban, Qyrym, Ýkraına, Belarýs, Polsha, Germanııa aspanyndaǵy shaıqastarǵa qatysqan. Qazaq qyzy qan maıdanda 300-den asa jaýyngerlik operatsııa oryndap, asa mańyzdy jaý shebin talqandaıdy.

2008 jyly 21 mamyrda Almaty qalasynda 86 jasynda dúnıeden ozdy.