Atyraý halqynyń 86 paıyzy vaktsınanyń birinshi komponentin aldy

NUR-SULTAN. QazAqparat – Búginde Atyraý oblysynda turǵyndardyń 86 paıyzy vaktsınanyń birinshi, 76 paıyzy ekinshi komponentin alypty. Bul týraly Atyraý oblysy ákiminiń orynbasary Baqytgúl Hamenova málim etti, dep habarlaıdy QazAqparat tilshisi.

«Elimizde jappaı ekpe alý júrip jatqanymen, qoǵamda oǵan qarsy adamdar áli de kóp. Ózderi bas tartyp qana qoımaı, halyqty keri úgittep otyr. Mundaı adamdar óziniń ǵana emes, ózgeniń ómiri úshin de jaýap beretinin túsinýge tıis. Osy oraıda «ekpe alýǵa qarsy úgittep júrgenderdiń jeteginde ketpegen jón» dep atap ótken edi Memleket basshysy. Búgingi kúni bizdiń oblysta vaktsınanyń I komponentin 215357 (86%) adam aldy, II komponenti 166 570 adamǵa (76%) salyndy. Bul - oblys boıynsha jalpy ekpege alýǵa jatatyn turǵyndardyń 71,8%. Qazir oblysta 59 vaktsına beketi jumys istep tur, onyń 10-y - jyljymaly», - dedi Baqytgúl Hamenova OKQ-de ótken baspasóz máslıhatynda.

Onyń aıtýynsha, bıyl aqpan aıynan beri óńirge vaktsınanyń І komponentiniń 248 330 dozasy jáne II komponenttiń 216 790 dozasy jetkizilgen.

«Qala jáne aýdandardaǵy ekpe alý boıynsha kúndelikti jospar bekitilip, reıtıng jasalyp otyr. Vaktsınatsııa boıynsha aqparattyq túsindirý úshin qala jáne aýdan ákimdikteri medıtsına qyzmetkerlerimen birlesip, kúndelikti aýlalardy aralaıdy. Odan bólek, óńirdegi vaktsınatsııa kórsetkishin jaqsartý maqsatynda saýda úıleri men oıyn-saýyq ortalyqtarynda túrli sharalar uıymdastyrylýda», - deıdi ol.