Atyraý gaz-hımııa kesheniniń murjasynda alaý tutandy: Aýadan synama alyndy
Qazir ıntegratsııalanǵan gaz-hımııa kesheniniń propılen óndiretin zaýytynda iske qosý-retteý jóndeý jumystary júrip jatyr. Atalǵan jumys sheńberinde bý týrbınasy bar propılen kompressoryn iske qosý júzege asyrylady.
«Kompressordy daıyndaýshy zaýyttan iske qosý jáne tehnologııalyq protsestiń lıtsenzıary – amerıkanlyq «Lummus Technology» kompanııasynyń usynymyna sáıkes kompressordy birinshi iske qosýdy, keıin 5 satyǵa kóshýdi júrgizý kezinde propannyń merzimmen baqylanatyn shyǵaryndysy júrgiziledi. Shyǵaryndy 5-6 mınýtqa sozylady. Bul kompressordyń qysý kezeńindegi qysymdy retteý jáne tótenshe jaǵdaıdyń aldyn alý úshin jasalady. Bıylǵy 27-28 tamyzda baqylanatyn shyǵaryndylar iske qosý talabyna sáıkes júrgizildi»,- dep habarlady kásiporynnyń baspasóz qyzmetinen.
Málimetke sáıkes, polıpropılen óndirý zaýytynyń shıkizaty – kontsentratsııasy 98,5%a deıin tazartylǵan Teńiz ken ornynyń propany. Paıdalanylǵan propan quramynda kúkirt pen kúkirtsýtegi joq. Propan janǵan kezde aýaǵa tek kómirqyshqyl gazy (SO2) men sý býy shyǵady.
«Keshendegi iske qosý protsesin tehnologııalyq personal, Man nemis kompanııasynyń shef-ınjenerleri jáne lıtsenzıar kompanııanyń ókilderi baqylaýda», - delingen taratylǵan aqparatta.
Osyǵan oraı oblystyq Ekologııa departamentiniń baspasóz qyzmeti atmosferalyq aýadan synama alynatyny týraly aqparat taratty.
«Jedel áreket etý maqsatynda departamenttiń zerthanalyq-taldamalyq baqylaý bóliminiń mamandary Integratsııalanǵan gaz-hımııa kesheniniń mańynan atmosferalyq aýa synamalaryn alýǵa attandy. Aýa synamasyn taldaý nátıjesiniń qorytyndysy qosymsha habarlanady», - dep málim etti departamentten.
Eske sala ketelik, budan buryn Atyraýda shóp órtenip, aýada kómirtegi totyǵy shekti mólsherden asyp ketkenin habarlaǵan edik.