«Atyraý» fýtbol komandasyna jankúıerlerdiń orynsyz áreketi úshin aıyppul salyndy

ATYRAÝ. QazAqparat – Qazaqstan chempıonatynyń 15-shi týry aıasynda «Munaıshy» stadıonynda ótken match kezinde jankúıerlerdiń jónsiz áreketi úshin «Atyraý» fýtbol klýbyna 345 000 teńge aıyppul salyndy, dep habarlaıdy QazAqparat tilshisi.

Match 15 shildede Atyraýdaǵy «Munaıshy» stadıonynda ótken. Oıyn 1:1 esebimen teń aıaqtaldy.

Qazaqstan fýtbol federatsııasynyń baspasóz qyzmetiniń habarlaýynsha, Tártiptik-baqylaý komıtetiniń otyrysynda «Munaıshy» stadıonyndaǵy, sondaı-aq match aıaqtalǵannan keıin jankúıerlerdiń tártibi qaralǵan.

«Atyraý» fýtbol klýby jankúıerleriniń matchtyń resmı tulǵalaryna balaǵat sózder aıtýy, sondaı-aq match aıaqtalǵannan keıin alańǵa eki jankúıerdiń shyǵýyna baılanysty tártiptik reglamenttiń 63-babynyń 1-tarmaǵyna sáıkes «Atyraý» FK-ǵa 100 AEK mólsherinde aıyppul salyndy. «Atyraý» FK aıyppuldy 2023 jyldyń 27 tamyzyna deıin tóleýi tıis», - delingen Qazaqstan fýtbol federatsııasynyń málimdemesinde.

Qazaqstanda 2023 jylǵa arnalǵan bir aılyq eseptik kórsetkish (AEK) 3 450 teńge bolǵandyqtan, kórermenderdiń jónsiz áreketi úshin «Atyraý» fýtbol klýbyna 345 myń teńge aıyppul salyndy.