Atyraý-Dossor-Beıneý avtojoly tórt jolaqty bolady

NUR-SULTAN. QazAqparat - Atyraý oblysyndaǵy eki jolaqty avtojoldy keńeıtý josparlanyp otyr. «Atyraý-Dossor-Beıneý-Aqjigit-Ózbekstan shekarasyna» deıingi kúre jol keńeıtilgenge deıin jeńil kólik ıeleri úshin tegin bolyp qala beredi, dep habarlaıdy «QazAvtoJol» UK» AQ baspasóz qyzmeti.

Atyraý oblysynyń Atyraý qalasynda jáne Beıneý, Jylyoı, Maqat aýdandarynda «Atyraý-Dossor-Beıneý-Aqjigit-Ózbekstan shekarasy» ýchaskesinde aqy alýdyń ashyq júıesin engizý máselesi boıynsha qoǵamdyq tyńdaý ótti.

Qoǵamdyq tyńdaýdyń qorytyndysy boıynsha kóptegen jyldar boıy jol azabyn tartqan oblys turǵyndary «QazAvtoJol» kompanııasynyń óńirde aqyly joldar jelisin damytý jónindegi josparlaryn qoldady, biraq halyqtyń aıtqan usynys-pikirlerin mindetti túrde eskerýin talap etti.

Jergilikti azamattar oblys joldarynyń tarlyǵynyń kesirinen jol apaty jıi bolatynyn alǵa tartty. Sondyqtan ár kezdesýde respýblıkalyq mańyzy bar joldardy 4 jolaqqa deıin keńeıtý máselesi kóterildi.

Ulttyq kompanııa ókilderi ashyq aqyly júıe engiziletin Atyraý oblysynyń joldary 2 jáne 3 tehnıkalyq sanatqa jatatynyn málimdedi. Biraq jaqyn arada olardy 1 sanatqa aýystyrý josparlanýda. Tıisinshe, jol ár baǵytta eki jolaqty bolady.

Al ázirge, «QazAvtoJol» baspasóz qyzmetiniń basshysy Dıas Ahmetsháriptiń aıtýynsha, «Atyraý-Dossor-Beıneý-Aqjigit-Ózbekstan shekarasy» ýchaskesin tek júk kólikteri úshin ǵana aqyly bolmaq.

«Qazirgi ýaqytta tólem mólsherlemesi áli bekitilmegen, olar júk kólikteriniń salmaǵyna, ıaǵnı tonnasyna qaraı esepteletin bolady. Biraq Qazaqstanda basqa eldermen salystyrǵanda jol aqysy eń tómen dep aıta alamyn. Sonymen qatar, 2 jáne 3 sanattaǵy trassalarda jeńil kólik ıeleri tólemnen bosatylǵan», - dep atap ótti ol.

Qoǵamdyq tyńdaýlardyń qorytyndysy boıynsha Atyraý oblysy turǵyndary «QazAvtoJol» Ulttyq kompanııasy basshylyǵyna kelesi usynystaryn aıtty:

- respýblıkalyq joldardy 4 jolaqqa deıin keńeıtý;

-Atyraý-Dossor-Beıneý-Aqjigit-Ózbekstan shekarasy ýchaskesinde júk kólikteri úshin kólik jýý, jaryqtandyrý baǵandaryn qurý, joldyń boıynda maldan qorshaý, uıaly baılanysty qurylǵylaryn ornatý;

- kommýnaldyq mekemelerdiń kólikterine jáne jergilikti turǵyndardyń salmaǵy 5 tonnaǵa deıingi júk kólikterine jeńildik abonementterin engizý;

- úı janýarlary úshin jaryq shaǵylystyrǵysh bırkalardy engizý.