«Atyrau Chess Festival» halyqaralyq shahmat festıvaliniń jeńimpazdary anyqtaldy
«Búgingi saıysqa qatysqan jastarymyzdyń keleshekte el namysyn abyroımen qorǵaıtyn ataqty grossmeısterler qatarynan tabylaryna senemin. «Atyrau Chess Festival» sekildi týrnırlerden atyraýlyq jastardy jıi kóremiz degen úmittemiz. Bul shara salamatty ómir saltyn ustanatyn barshanyń merekesine aınaldy. Endi «Atyrau Chess Festival» halyqaralyq festıvali dástúrli túrde uıymdastyrylady « , - dedi oblys ákimi Serik Shápkenov.
Halyqaralyq shahmat festıvaline 9 elden 300-den astam sportshy qatysty.
«Bul qyzyqty ári tartysty ótken segiz kúnge sozylǵan festıval boldy. Festıvalǵa qatysýshylarǵa, shahmat jankúıerlerine alǵysym sheksiz. Sizder osyndaı týrnır arqyly sheberlik shyńdady degen senimdemin», - dedi álem chempıony Dınara Sádýaqasova.
«Atyrau Chess Festival» týrnıriniń qorytyndysymen áıelder arasynda Ekaterına Borısova I oryndy ıelendi. Al, Nazerke Nurǵalı ІІ oryndy, Alýa Nurlanova ІІІ oryndy enshiledi.
Erler arasynan Tımýr Gareev І oryn alyp, jeńis tuǵyrynan kórindi. II oryn Arsenıı Nesterovke buıyrdy. Sergeı Tıvıakov ІІІ oryndy mise tutty.
Sonymen qatar, aımaq basshysy dodanyń eń úlken qatysýshylary 81 jastaǵy Aǵasha Bókenbaı men 64 jastaǵy Tappatqan Qabyshevaǵa 250 myń teńgeniń sertıfıkatyn tabystap, shhmatta ese jibermegen ardager sportshylarǵa qurmet kórsetti.
Qazaqstan-Brıtan Tehnıkalyq ýnıversıtetiniń ókili Klara Muqashkereeva atalǵan oqý ordasynyń bilim grantyn Sherýen Batyrhan men Abzal Ámirálige tapsyrdy.
Atyraý qalasynyń ákimi Meıirim Qalaýı «Atyrau Chess Festival» halyqaralyq týrnıriniń eń jas qatysýshysy 4 jasar Qaırat Abdýl-Málikke 200 myń teńgeniń sertıfıkatyn usyndy.
Sharada «Atyrau Juniors» týrnıriniń qatysýshylary jas ereksheligi boıynsha marapattaldy.