Atyraý: balalardyń ishek aýrýymen jappaı aýyrǵandyǵy jaıly aqparat jalǵan

ATYRAÝ. QazAqparat - Áleýmettik jelilerde taraǵan Atyraýda balalar arasynda jedel ishek aýrýy, dıareıa kóbeıdi delingen aqparat shyndyqqa janaspaıdy, dep habarlaıdy QazAqparat Atyraý oblystyq densaýlyq saqtaý basqarmasynyń baspasóz qyzmetine silteme jasap.

Qazirgi ýaqytta eldegi koronavırýs indetine baılanysty №2 Atyraý oblystyq aýrýhanasy «COVID-19» juqtyrǵan naýqastardy ǵana emdeıdi.

Atalǵan aýrýhanadaǵy «Juqpaly aýrýmen aýyratyn balalar» bólimshesi ýaqytsha Atyraý oblystyq balalar aýrýhanasyna epıdemıologııalyq statsıonar retinde aýystyryldy.
Sol sebepti ınfektsııalyq juqpamen aýyryp kelgen balalardy Atyraý oblystyq balalar aýrýhanasy qabyldaýda.

Atyraý oblystyq balalar aýrýhanasynyń bas dárigeri Nurqabyl Aıtmuhanbetovtyń aıtýynsha, bıylǵy jyldyń 1 tamyzynan 4 qyrkúıekke deıingi aralyqta oblystyq balalar aýrýhanasynan 62 naýqas emdelip shyqty.
«Ótken jylda dál osy kezeńde juqpaly aýrýmen 208 naýqas qabyldanǵan. Bıylǵy jyly 146 naýqasqa azaıdy. Áleýmettik jelide balalar arasynda dıareıa tarady degen aqparat jalǵan,- dedi oblystyq balalar aýrýhanasynyń bas dárigeri Nurqabyl Aıtmuhanbetov.