Atyraý avtobýstarynda saralanǵan tarıf 1 qazannan bastap engiziledi

ATYRAÝ.QazAqparat- Atyraýda saralanǵan tarıf engizý kúni 1 qazanǵa aýystyryldy. Keıinge qaldyrý sebebi - turǵyndardyń jol kartalaryn satyp alý belsendiligi tómen, dep habarlaıdy QazAqparat qalalyq ákimdiktiń baspasóz qyzmetine silteme jasap.

«Smart Atyraý» MKK dırektory Ádilbek Tankıev qoǵamdyq kólikte saralanǵan tarıf engizý keıinge shegeriletinin habarlady. Spıkerdiń aıtýynsha, birqatar sebepterge baılanysty merzim 15 qyrkúıekten 1 qazanǵa aýystyryldy.

«Birinshiden, turǵyndardyń jol júrý kartasyn satyp alý belsendiligi tómen. Ekinshiden, turǵyndardyń ózi bul kúndi eki aptaǵa shegerý týraly usynys bildirdi, óıtkeni 200 myń adamnan turatyn jeńildik sanatyna jatatyn turǵyndar áli de jeke kartalaryn alyp úlgermegen. Qazirgi ýaqytta 90 myńǵa jýyq oqýshyǵa, 50 myńnan astam stýdentke, 27 myń zeınetkerge, 30 myńnan astam múgedekter men olardyń qamqorshylaryna jeke jol júrý kartalary shyǵarylyp jatyr», - dep túsindirdi Ádilbek Tankıev.

Aıta keteıik, búginde Atyraýda jol kartalaryn satatyn tórt oryn bar - «Vokzal mańy», «Vokzal», «Oblystyq perzenthana» jáne «Avangard sońǵy aıaldama». Aldaǵy ýaqytta jol kartalaryn shyǵarý «Nursaıa» shaǵynaýdanynda, «Turǵyn úılerge kommýnaldyq qyzmet kórsetý» JShS ǵımaratynda júzege asyrylady. Turǵyndar daıyn kartalardy tek bir núkteden - «Vokzal mańy» aıaldamasynan ala alady.

Eske sala keteıik, saralanǵan tarıf engizilgen soń jolaqy qolma-qol tólegen jaǵdaıda – 150 teńge, kartamen tólese – 80 teńge bolady.

Foto: azh.kz