Atyraý áýejaıynda Hıýaz Dospanovaǵa memorıaldyq taqta ornatyldy
Bıyl Úkimet qaýlysymen Atyraýdaǵy Halyqaralyq áýejaıǵa qazaqtyń ushqysh qyzy, Halyq qaharmany Hıýaz Dospanovanyń esimi berilgen bolatyn. Qazir áýejaı ǵımaratyna qaharman ushqyshtyń esimi jazylǵan. Al búgin áýejaı aldyna ornatylǵan memorıaldyq taqta saltanatty jaǵdaıda ashyldy.
«Ekinshi dúnıejúzilik soǵys halqymyzǵa ońaı bolmady. Mıllıondaǵan bozdaq maıdan dalasynda máńgilikke qaldy. Jaralanyp oralǵandar densaýlyǵyn joǵaltty. Soǵysta qaaqtyń qaısar qyzdary da erliktiń qaıtalanbas úlgisin kórsetti. Sonyń biri – dańqty ushqysh Hıýaz Dospanova. Onyń áýeden soqqy jasaýdaǵy erligi elimizdiń Halyq Qaharmany ataǵymen laıyqty baǵalandy. Bıyl Atyraýdaǵy halyqaralyq áýejaı batyrdyń esimi berildi. Biz árkez dańqty maıdangerlerimizdiń erligin keıingi urpaqqa keńinen nasıhattap, qurmet tutamyz», - dedi oblys ákimi Mahambet Dosmuhambetov.
Oblystyq ardagerler keńesiniń tóraǵasy Qatımolla Rızýanovtyń aıtýynsha, óńirde dańqty ushqyshtyń erligin nasıhattaý qolǵa alynǵan. Sonyń qatarynda Hıýaz Dospanova atyndaǵy medal da bar.