Atyraý aýdıtorlary 6 aıda 25 mlrd teńgeniń qarjy buzýshylyǵyn anyqtady
Atyraý oblystyq ishki memlekettik aýdıt departamenti basshysynyń orynbasary Jalǵas Boqaevtyń málimetinshe, memlekettik satyp alý zańnamasynyń saqtalmaýy qarjylyq buzýshylyqqa jol ashady.
«Bıylǵy 6 aıda 47 aýdıtorlyq is-sharanyń qorytyndysymen 827 mln teńgeniń, kameralyq baqylaý kezinde 25 mlrd 816 mln teńgeniń qarjy buzýshylyǵy anyqtalyp otyr. Sybaılas jemqorlyq táýekeli bar úsh is quqyq qorǵaý organdaryna berildi. Máselen, Jylyoı aýdanyndaǵy №2 orta mektepte 2018-2021 jyldary jumys istemeıtin 2 adamnyń shotyna 5 mln 119 myń 116 teńge bıýdjet qarjysy negizsiz aýdarylǵany anyqtaldy. Aýdıt qorytyndysymen negizsiz tólengen bıýdjet qarajaty keri qaıtarǵan. Osy aýdandaǵy Qosshaǵyl aýylyndaǵy mádenıet úıi dırektory 2020-2021 jyldary 2 adammen eńbek sharty jasalyp, olardyń shotyna 992 myń 395 teńge aýdarylǵan. Alaıda, aýdıt kezinde atalǵan adamdardyń mádenıet úıinde jumys istemegeni dáleldendi», - dep habarlady Jalǵas Boqaev.
Onyń aıtýynsha, Qurmanǵazy aýdanyndaǵy Shortanbaı aýyldyq mádenıet úıine de jospardan tys aýdıtorlyq is-shara júrgizilgen. Sol kezde esepshiniń 2022 jyly óziniń banktegi kartasyna 13 mln 184 myń teńgeni aýdaryp alǵany anyqtalǵan. Esepshi zańsyz ıelengen qarjynyń 5 mln 650 myń teńgesin qaıtarǵan.
«Sot sheshimimen mektep dırektoryna 4 jyl 6 aıǵa bas bostandyǵyn shekteý, al mádenıet úıiniń dırektoryna 3 jyl 6 aıǵa merzimge bas bostandyǵynan aıyrý jazasy taǵaıyndaldy. Shortanbaı mádenıet úıiniń esepshisine 5 jyl merzimge materıaldyq jaýapty laýazymdardy atqarý quqyǵynan, 6 jylǵa bas bostandyǵynan aıyrý jazasy berildi. Mektep dırektory men mádenıet úıiniń esepshisine berilgen jazany óteý 5 jylǵa keıinge shegerildi», - dep málim etti Jalǵas Boqaev.
Eske sala ketelik, budan buryn Atyraý oblysynda aýrýhanalardyń kásipkerlerge qaryzy 1,4 mlrd teńgeden asatynyn jazǵan edik.