Atyraý ákimi kontslager tutqynynda bolǵan Ekaterına Absatyrovany quttyqtady

ATYRAÝ. QazAqparat – Atyraýda balalyq shaǵyn kontslager tutqynynda ótkizgen Ekaterına Absatyrova turady. Búgin Atyraý oblysynyń ákimi Serik Shápkenov 92 jastaǵy keıýanany Jeńis kúnimen quttyqtady, dep habarlaıdy QazAqparat.

Ekinshi dúnıejúzilik soǵys bastalǵan 1941 jyly Ekaterına Absatyrova otbasymen birge Fınlıandııadaǵy kontslagerde túsken. Ol sol kezde 10 jasta bolǵan.

«Syn saǵatta elin qorǵaǵan ardagerlerimizdi qurmetteý – bizdiń paryzymyz. Sol bir qıyn kúnder tarıh qoınaýyna endi. Alaıda, maıdangerlerdiń erligi men tyl eńbekkerleriniń eńbegi eshqashan umytylmaıdy. Soǵysta jeńimpaz bolmaıdy. Biz sol kezdiń aýyrtpalyǵyn kórgen joqpyz. Qazir beıbit zamanda ǵumyr keshýdemiz. Jaqsylyqtarǵa tez úırenemiz. Alaıda, sol kez halyq úshin óte aýyr boldy. Siz de qıyndyq kórdińiz. Biraq, moıyǵan joqsyz. Denińiz saý bolyp, uzaq ǵumyr jasańyz», -dedi Serik Shápkenov.

Kontslager tutqyny bolǵan Ekaterına Absatyrova 1931 jyly 19 qańtarda Mordovııada dúnıege kelgen. Onyń otbasy kontslager tutqynynan 1944 jyly bostandyqqa shyqqan.

«Sodan ekinshi dúnıejúzilik soǵys aıaqtalǵanǵa deıin ártúrli jumys istedim. Ashanada aspaz, áskerı gospıtalda sanıtar sekildi jumystardy atqardym», -deıdi Ekaterına Absatyrova.

Soǵystan keıin atyraýlyq Vagaf Absatyrovpen otbasyn qurǵan. 1968 jyly otbasymen Atyraýǵa kóship kelgen.

Jergilikti lokomotıv deposyna jumysqa ornalasyp, mashınısterdiń demalys úıinde kezekshilik atqarqan. Sol depodan zeınetke shyqqan.

Eske sala ketelik, budan buryn bala kezinde kontslager tutqyny bolǵan atyraýlyq keıýanaǵa 1 mln teńge beriletinin jazǵan edik.

Sondaı-aq, atyraýlyq ardager Ekaterına Absatyrova kontslagerdegi azapty kúnder áli de túsine kiretinin aıtqan edi.