Atyraý ákimdigi tazalyq saqtamaǵan kásipkerlerge aıyppul salyp jatyr

ATYRAÝ. QazAqparat - Atyraýda irgeles aýmaqtardy abattandyrý erejesin saqtamaǵany úshin ShOB sýbektilerine 100-ge jýyq uıǵarym berildi. Sondaı-aq, bıznes sýbektileriniń irgeles aýmaqtardy abattandyrýyn tekserý úshin reıdtik is-sharalar bastaý aldy dep habarlaıdy, QazAqparat tilshisi Atyraý qalalyq ákimdiginiń baspasóz qyzmetine silteme jasap. 

Profılaktıkalyq reıd búgin bastaldy. ShOB sýbektileri tazalyq pen tártip saqtaý, sondaı-aq jasyl kóshetterdi kútip-baptaý jáne qorǵaý boıynsha tekserildi.

Olardyń arasynda dúkender, sýpermarketter, saýda úıleri men qoǵamdyq tamaqtandyrý oryndary bar.

Tekserýshi toptyń quramyna Atyraý qalalyq kásipkerlik bóliminiń, sondaı-aq quqyq qorǵaý organdarynyń mamandary kirdi. Reıdtiń alǵashqy kúni 5 bıznes obektisi tekserildi. Olardyń kópshiliginen kemshilikter anyqtaldy.
 

«Shahar basshysy qalany aralaǵan kezde kásipkerlerdiń irgeles aýmaqtardy abattandyrmaı, kútip ustamaı, biraz kemshilikter jibergeni anyqtalǵan edi. Zańdy tulǵalarǵa sol kemshilikterdi joıý jóninde júzge jýyq uıǵarym berdik. Máselen, keı kásipkerlerdiń aýmaǵynda turmystyq jáne qurylys qaldyqtary jatty, endi bireýleri irgeles jer telimin ruqsatsyz ıelenip alǵan. Obektisiniń syrtqy kelbeti talapqa saı emes. Sol úshin olarǵa aıyppul salyndy. Keıbir zańdy tulǵalarǵa eskertý jasaldy», - deıdi qalalyq kásipkerlik jáne týrızm bóliminiń basshysy Rýslan Dáýletov.
 

Eske sala ketsek, osyǵan deıin Atyraý qalasynyń ákimi Alımuhammed Quttumuratuly oblys ortalyǵynyń birneshe yqshamaýdanyn aralap, qaramaǵyndaǵylarǵa qozǵalysy kóp jol qıylystaryndaǵy kólik qatynasyn jeńildetý, sondaı-aq qala ortalyǵyn qoqys pen qurylys qaldyqtarynan tazartý,  turǵyn úılerdiń qasbetterindegi aqaýlardy joıý jáne jol jıegindegi ıesiz jer ýchaskelerin kórkeıtý boıynsha birqatar naqty tapsyrmalar bergen edi.