Atyn atamaýdy ótingen kásipker medrese shákirtine 1 mln teńge berdi

ORAL. QazAqparat – Oraldyq kásipker medrese shákirti Ádıet Aıdynálıevke ota jasatý úshin 1 mln teńge berdi, dep habarlaıdy QazAqparat tilshisi.

Báıterek aýdany Asan aýyldyq meshitiniń bas ımamy Muratbek Jahatovtyń aıtýynsha, Ádıet Aıdynálıev Oraldaǵy úsh jyldyq medreseniń birinshi kýrsynda oqıdy.

Osydan alty jyl buryn Ádıet aýyr dertke dýshar bolyp, jambas súıekteriniń qyzmeti buzylǵan. Sonyń saldarynan eki aıaǵyn súıretip bassa da, namazdan qalǵan emes.

Qazir 26 jastaǵy Ádıet Qasıetuly bolashaqta medresedegi oqýyn bitirgennen keıin shetelde bilimin kóterýdi armandaıdy. Oǵan deıin naýqasynan qulantaza jazylýdy maqsat etip otyr.

«Ádıet otany Túrkııada jasatqysy keledi. Oǵan 40 myń AQSh dollary kerek. Sondyqtan qaladaǵy meshitter arqyly medrese shákirtine aqpan aıynan beri qarjy jınalýda. Osyny estigen meshitke kelip júrgen kásipker aty-jónin atamaýdy ótinip, qasıetti ramazan aıynda qaıyrymdylyq kórsetip, 1 mln teńge berdi. Biz muny Ádıetke tabys ettik. Ol buǵan deıin 6 mln teńge qarjy jınalǵanyn jetkizdi. Osylaısha jalǵasa berse, baýyrymyzdyń emine qajetti qarajat jetip qalar. Alla shıpasyn bersin!», dedi QazAqparat tilshisine Muratbek Jahatov.

Eske sala keteıik, budan buryn BQO-da kásipker aýyldastarynyń qaryzyn keshirgenin jazǵan bolatynbyz.