Aty ańyzǵa aınalǵan Attıla týraly kitaptyń tusaýkeseri ótti

NUR-SULTAN. QazAqparat - Búgin Halyqaralyq Túrki akademııasy Majarstan jáne Qazaqstan Syrtqy ister mınıstrleriniń qatysýymen aty ańyzǵa aınalǵan ǵun ámirshisi Attıla týraly «The Lord of Europe Attila» (Eýropa ámirshisi Atılla) atty ǵylymı eńbekti tanystyrdy.

Akademııanyń qoldaýymen aǵylshyn tilinde jaryq kórip otyrǵan atalǵan eńbektiń avtory – kórnekti ǵalym, ǵun tarıhynyń bilikti mamany, Majarstannyń Mońǵolııadaǵy Tótenshe jáne ókiletti elshisi Borbala Obrýshanskı.

Ǵylymı eńbek tyń derekterimen jáne arǵy ǵun zamandarynan orta ǵasyrdaǵy túrki dáýirine deıingi dástúr sabaqtastyǵyn jańa kózqaras turǵysynan saralaǵanymen erekshelenedi.

Halyqaralyq Túrki akademııasynda ótken jańa basylymnyń tusaýkeser rásimine Majarstannyń Syrtqy saýda jáne syrtqy ister mınıstri Peter Sıııarto, Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi, Halyqaralyq Túrki akademııasynyń prezıdenti Darhan Qydyráli, Majarstannyń Qazaqstan Respýblıkasyndaǵy Tótenshe jáne ókiletti elshisi Mıhaı Galoshfaı, sonymen qatar Majarstan delegatsııasy, memleket jáne qoǵam qaıratkerleri qatysty.