Atom salasynda kadrlar daıarlaý qaı deńgeıde - Energetıka mınıstrligi

NUR-SULTAN. QazAqparat - Atom salasynda bilikti kadrlardy daıarlaý aıasynda 2010 jyldan bastap qazirgi ýaqytqa deıin Qazaqstannyń joǵary oqý oryndarynda 2193 bakalavr, 909 magıstr jáne 135 doktor daıyndaldy, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.

«Birikken ıadrolyq zertteýler ınstıtýty» halyqaralyq uıymymen yntymaqtastyq sheńberinde 2010 jyldan bastap 2019 jylǵa deıin atom salasynyń mamandyqtary boıynsha 134 bakalavrıat pen magıstrant oqýdan ótti.

2018 jyldan bastap L.N. Gýmılev atyndaǵy Eýrazııa ulttyq ýnıversıteti jáne Birikken ıadrolyq zertteýler ınstıtýty arasynda ıadrolyq fızıka jáne jańa materıaldar salasyndaǵy PhD doktoranttaryn birlesip daıarlaý bastaldy.

«QR Ulttyq ıadrolyq ortalyǵy» RMK bazasynda jyl saıyn ıadrolyq jáne tehnıkalyq fızıka, sondaı-aq materıaltaný salasynda 120-dan astam stýdent úshin praktıka uıymdastyrylady.

Atom salasynda kadrlar daıarlaýdy kózdeıtin memorandýmdar Japonııanyń Ekonomıka, saýda jáne ónerkásip mınıstrligimen (2014 jyl), Belarýs Respýblıkasynyń Energetıka mınıstrligimen (2018 jyl) jáne «Rosatom» atom energııasy jónindegi memlekettik korporatsııasymen jasalǵan bolatyn.

Qazirgi ýaqytta QR Energetıka mınıstrligi Majarstannyń Innovatsııalar jáne tehnologııalar mınıstrligimen atom salasynda qazaqstandyq kadrlardy daıarlaý jáne oqytý boıynsha memorandým jasasý máselesin pysyqtaýda.

Memorandýmǵa sáıkes taraptar birlesken bilim berý baǵdarlamalaryn uıymdastyrýdy, bakalavrıat, magıstratýra, aspırantýra baǵdarlamalary boıynsha bilim alýshylarmen jáne oqytýshylarmen almasýdy, oqý jáne ǵylymı ádebıetti ázirleýdi, qysqa merzimdi taǵylymdamalar men semınarlardy uıymdastyrýdy qosa alǵanda, atom salasy úshin kadrlar daıarlaý salasynda yntymaqtastyqty júzege asyrýǵa nıet bildiredi.

Qazaqstannyń atom energetıkasynda mol tájirıbesi bar ekenin atap ótken jón. Aqtaý qalasynda 1973-1999 jyldary jyldam neıtrondardaǵy álemdegi alǵashqy ónerkásiptik BN-350 reaktor sátti qoldanyldy.

Qazirgi ýaqytta 3 zertteý reaktory sátti paıdalanylýda – IGR jáne JTGSZ.1M QR «Ulttyq ıadrolyq ortalyǵynda» (Kýrchatov q.), VVR-K ıadrolyq fızıka ınstıtýtynda (Almaty q.).

ıAdrolyq jáne radıatsııalyq qaýipsizdik turǵysynan zertteý reaktorlaryna energetıkalyq reaktorlardan kem emes qatań talaptar qoıylady, olar kóptegen jyldar boıy oıdaǵydaı oryndalyp keledi, bul olardy qaýipsiz paıdalanýdyń uzaq tarıhymen rastalady.