Atom energetıkasy salasynda maman tapshylyǵy bolmaıdy - Ǵumar Serǵazın

<p>ASTANA. KAZINFORM &ndash; Búgin elordada atom energetıkasy salasyndaǵy jetekshi sarapshylar, jas ǵalymdar men belsendi jastar beıbit atomdy tıimdi qoldaný jáne atom energetıkasyn damytýdyń ózekti máselelerin talqylaýǵa arnalǵan jıynǵa qatysty.</p>

Kezdesý barysynda jas ǵalymdar ıadrolyq fızıka salasyndaǵy ǵylymı zertteýlerdiń nátıjelerin tanystyryp, Qazaqstandaǵy atom energetıkasyn damytýǵa baǵyttalǵan óz ıdeıalaryn aıtty.

«Atom energetıkasyn damytýdy energetıkalyq qaýipsizdikti qamtamasyz etý turǵysynda qarastyryp otyrmyz. Sarapshylar aldaǵy kezeńde elektr energııasy boıynsha eleýli tapshylyq bolýy múmkin ekenin aıtyp jatyr. Álemniń biraz memleketi atom energetıkasyn damytyp keledi. Qazaqstan mamandary qarastyryp otyrǵan reaktorlar ІІІ+ tehnologııasyna jatady, ıaǵnı bulardaǵy qaýipsizdik deńgeıi óte joǵary», - dedi QR Energetıka mınıstrligi Atom energetıkasy jáne ónerkásibi departamentiniń dırektory Ǵumar Serǵazın.

Onyń aıtýynsha, qazan aıynda ótetin referendýmda halyq AES qurylysyn qoldasa, odan keıin vedomstvo bul nysandy salatyn vendordy tańdaýǵa kirisedi.

«Referendýmda qoldaý bolsa, biz kelissózge kirisemiz. Máselen, 2025 jyly vendordy anyqtaý, úkimetaralyq kelisimder men tıisti sharttardy bekitý úshin daıyndyq jumystaryn atqarý kerek. Jalpy, AES qurylysyna 5-6 jyl, sondaı-aq daıyndyq jumystaryna 3-5 jyl ýaqyt kerek. Biz 2 reaktordyń qurylysyn qarastyryp otyrmyz. Osynyń bárin eskere otyryp, 10-11 jyl aralyǵynda atom elektr stantsııasyn paıdalanýǵa berýge bolady», - dedi departament basshysy.

Onyń sózine qaraǵanda, atom energetıkasy salasynda elimizde maman tapshylyǵy bolmaıdy.

«Elimizdiń osy salada ǵylymı jáne kadrlyq áleýeti bar. Sonymen qatar, AES qurylysyna qatysatyn vendordy tańdaǵan kezde, olarmen birge otandyq ǵalymdardyń bilimin jetildirý baǵdarlamasyn daıarlaımyz. Atap aıtqanda, 10 jyl ishinde mamandardyń birneshe býynyn daıyndyqtan ótkizý múmkindigi bar. Sheteldik AES-terde bizdiń mamandardy taǵylymdamadan ótkize alamyz. Sondyqtan bizde mamandar tapshy bolady degen ýájben kelispeımin», - dedi Ǵ. Serǵazın.

Buǵan deıin AES boıynsha referendým bıýlleteninde qandaı saýal bolatynyn jazǵan edik.

Mamandar AES-ti paıdalaný kezinde 2000 maman kerek bolatynyn aıtty.