Atom elektr stansasy Almaty oblysyndaǵy Úlken aýylynyń mańyna salynady

NUR-SULTAN. QazAqparat – QR Energetıka mınıstri Bolat Aqsholaqov atom elektr stansasy salynatyn oryndy naqtylady, dep habarlaıdy QazAqparat tilshisi.

«Naqty oryn emes, ornalasatyn óńirge qatysty vedomstvoaralyq komıssııa ótkizdik. Qalaı desek te, ol Balqash kóli mańynda ornalasady. Bul - Almaty oblysyndaǵy Úlken aýylynyń tóńiregi. AES salynatyn jerdi aıqyndadyq»,- dedi Bolat Aqsholaqov Prezıdent janyndaǵy Shetel ınvestorlary keńesiniń otyrysynan keıin BAQ ókilderine.

Onyń atap ótýinshe, endi atom elektr stansasy qurylysyna qatysty birqatar aspektini zerdeleý qajet.

«Bıyl osy ýaqytqa deıin birneshe ret aıtqan nıýanstardy zerdeleý jumysyn júrgizý qajet. Olar geologııa jáne sýǵa baılanysty mán-jaılar. Osydan keıin naqty koordınattar belgili bolady. Sodan soń esepteýlerdi baılanystyramyz. Biraq esep júrgizý úshin tehnologııany aıqyndaý qajet. Tehnologııany kelesi jyly aıqyndaımyz»,- dedi mınıstr.