Atom elektr stansasynyń qurylysy 10 jyl ýaqyt alady – Roman Sklıar

<p>ASTANA. KAZINFORM &ndash; Elimizde salynatyn AES qyzmetin kadrmen qamtý maqsatynda halyqaralyq biliktiligi bar barlyq deńgeıdegi joǵary bilikti maman&ndash;ınjenerler pýly daıyndalady. Bul týraly Premer-Mınıstrdiń birinshi orynbasary Roman Sklıar málim etti.</p>

«Ortasha alǵanda atom elektr stansasynyń qurylysy 10 jyl ýaqyt alady. Osy ýaqyt aralyǵynda kadrlardy daıyndaý boıynsha arnaıy baǵdarlama ázirlenedi. AES obektisinde tolyǵymen qazaqstandyq mamandar qyzmet kórsetedi. Sonymen qatar halyqaralyq biliktiligi bar barlyq deńgeıdegi joǵary bilikti maman–ınjenerler pýly daıyndalady», - dedi  Roman Sklıar Úkimet otyrysynan keıin ótken baspasóz máslıhatynda. 

Sondaı-aq, mınıstr mamandar AES-tiń shtat quramynda bolatynyn aıtty. 

Buǵan deıin Roman Sklıar AES qurylysy jaıynda saıası táýekelder týyndaǵan sátinde qarastyrylatynyn aıtqan edi. 

«Konsortsıým bolatyn shyǵar. Eń bastysy — qaýipsizdik. Sonymen qatar biz salynatyn jańa stansa eń tyń jobalyq sheshimder men óz salasynyń kóshbasshysy sanalatyn óndirýshi eldiń ozyq tehnologııasy bolǵanyna múddelimiz. Sondyqtan sheshim konfıgýratsııa boıynsha qabyldanady. Onymen men de, Almasadam Maıdanuly da (Energetıka mınıstri Almasadam Sátqalıev) aınalyspaıdy. Arnaıy jobalyq top bolady. Al oryn alýy múmkin saıası táýekelder týyndaǵan sátinde, ıaǵnı jobalaý barysynda qarastyrylady. Eger mundaı jaıt oryn alsa, onda túrli kompanııalarmen, túrli eldermen aradaǵy shartta sanktsııalyq kelisim bolatyndyǵy sózsiz, - dedi Úkimet basshysynyń birinshi orynbasary BAQ ókilderiniń saýalyna oraı.