Atqarýshy organdar men halyq arasyndaǵy baılanysty kúsheıtý kerek – Nurlan Noǵaev
Eseptik kezdesý barysynda aýdan ákimi Aıbek Qosýaqov jyl boıy atqarylǵan jumystar týraly esep berdi. Óz kezeginde Nurlan Noǵaev Túpqaraǵan aýdany turǵyndarynyń suraqtaryna jaýap berdi. Jıynda halyqty aýyz sýmen qamtý, densaýlyq saqtaý salasy, sport jarystaryn qarjylandyrý tártibi, jumyspen qamtý jáne taǵy basqa máseleler kóterildi.
Óńir ákimi Túpqaraǵan aýdanynyń densaýlyq saqtaý salasynyń jaǵdaıymen tanysty. Aýdan boıynsha 1 emhana, 1 aýrýhana, 3 dárigerlik ambýlatorııa jáne 1 feldsherlik-akýsherlik pýnkt jumys isteıdi. Ár aýylda medıtsınalyq ambýlatorııalar, alǵashqy medıtsınalyq kómek kórsetý ortalyqtary, aýysymyna 100 kelýshini qabyldaıtyn emhana jáne 2 jeke densaýlyq saqtaý uıymdary jumys isteıdi. 2021 jyly týberkýlez aýrýhanasynyń ǵımaratyna kúrdeli jóndeý júrgizilip, keıin bul nysan provızorlyq statsıonarǵa aınaldy. Infektsııalyq jáne balalar bólimshesi jóndeýden ótti. Sondaı-aq, ottegimen qamtamasyz etetin 87 pýnkti ornatylǵan. Aýdanda barlyǵy 48 dáriger, 150 kishi medıtsına qyzmetkerleri bar.
Sodan keıin oblys ákimi aýdan belsendilerimen kezdesti. Onda jumysqa ornalasý, ekologııa, halyqty aýyz sýmen qamtamasyz etý jáne jer qatynastary, teńiz porty jáne temir jol qurylysy máseleleri talqylandy. Jıynǵa belsendilerden basqa, jergilikti atqarýshy organdardyń basshylary, ardagerler jáne basqa da jaýapty tulǵalar qatysty.
Nurlan Noǵaev keńeste kóterilgen máseleler basymdyqtarǵa qaraı sheshiletinin atap ótti.
«Atqarýshy organdar men halyq arasyndaǵy baılanysty tereńdetýimiz qajet. Bul tapsyrma el Prezıdenti Qasym-Jomart Toqaevtyń Joldaýynda kórinis tapqan. Belgili bir sharalardy qabyldaýda halyqtyń suranysy men usynystaryn eskerý mańyzdy. Memleket basshysynyń tapsyrmalaryn iske asyrý maqsatynda biz eńbek ujymdarymen, aýyl, qala, aýdan jáne oblys turǵyndarymen jıi kezdesýler uıymdastyramyz. Bul aımaqtaǵy máselelerdi der kezinde sheshýge múmkindik beredi. Aıta keteıik, mundaı kezdesýler óz tıimdiligin kórsetip te úlgerdi. Sondaı-aq, bizde Telegram qosymshasynda arnaıy chat-kanal jumys isteıdi, onda 9 myń adam bar. Meniń áriptesterim jáne jeke ózim kún saıyn halyqtyń suraqtaryna jaýap beremiz. Bul keri baılanystyń jaqsy quraly», - dep atap ótti oblys ákimi.
Odan bólek, Nurlan Noǵaev Túpqaraǵan aýdanynyń jastarymen erkin formatta kezdesý ótkizdi. Jınalys barysynda ol oblysta júrgizilip jatqan jumystar týraly aıtyp, qatysýshylardyń suraqtaryna jaýap berdi jáne jergilikti atqarýshy organdar jastar bastamalaryna jan-jaqty qoldaý kórsetýge daıyn ekenin jetkizdi.