Atqa minip qylmyskerdi quryqtaıdy: Óskemende attan túspeıtin polıtseıler jaıly

ÓSKEMEN. QazAqparat – Halyqtyń tynyshtyǵyn kúzetetin polıtsııa qyzmetkerleriniń jumysy qarbalas, ár kúni qaterli. Olar kósheni tek kólikpen emes, atpen de patrýldeıdi. Bara jatqannyń baltasyn, kele jatqannyń ketpenin qoımaıtyn ury-qarylar jer úılerge, saıajaıǵa jıi túsedi. Al tórt túliktiń tóresine mingen saqshylar kólik júre almaıtyn jerlerde qylmyskerlerdi uzatpaı qolǵa túsiredi. QazAqparat tilshisi 23 maýsym - Qazaqstan polıtsııasy kúnine oraı Óskemen qalalyq PB patrýldi polıtsııa batalony kavalerııalyq bólimshesinde eńbek etip júrgen polıtsııa kapıtany Ernar Ádilqanovpen suhbat qurǵan bolatyn.

- Áńgimemizdi týyp-ósken jerińizden bastasaq…

- 1984 jyly Shyǵys Qazaqstan oblysy Tarbaǵataı aýdany Mańyraq aýylynda dúnıege keldim. Sondaǵy Ahmet Baıtursynuly atyndaǵy mektepti támamdap, Óskemendegi Shyǵys Qazaqstan tehnıkalyq ýnıversıtetine «Jol qozǵalysyn uıymdastyrý» mamandyǵy boıynsha oqýǵa tústim. 2006 jyly qolyma dıplom aldym. Sol jyly ishki ister organyna qabyldanyp, qaladaǵy mamandandyrylǵan kúzet basqarmasynda ınspektor retinde jumysqa kiristim.

2012 jyly patrýldik polıtsııa bóliminde vzvod komandıri bolyp aýystym. Ol jaqta 4 jyl jumys istegen soń, kavalerııalyq bólimshe komandıriniń orynbasarlyǵyna taǵaıyndaldym. Mine sodan beri osy ýaqytqa deıin taban aýdarmaı qyzmet etip kelemin.

- Atty polıtseılerdiń mindeti qandaı?

- Jer úılerdi, saıajaılardy, kólik júre almaıtyn jerlerdi patrýldeımiz. Urlyqtyń bolmaýyn qadaǵalap, joǵalǵan maldy izdeımiz. Jumys tańǵy 07.00-de bastalady. Saptyq jıynnan soń 08.00-de Menovnoe aýylynda ornalasqan bazaǵa kelemiz. Bizde barlyǵy 10 at bar. Ár saqshyǵa bir attan bekitilgen. Attarǵa jem beremiz, jýyndyramyz, taraımyz.

Sodan keıin júırikke minip, jumysqa kirisemiz. Panton kópiri, Ahmer aýyly men Televyshka aýdanynda júremiz. Bul jerlerde tek jeke turǵyn úıler ornalasqan. Saǵat 9.00-16.00 aralyǵynda tártipti kúzetemiz.

- Kóbinese qandaı qylmystar tirkelip jatady?

- Іshimdik iship júretinderdi jıi baıqaımyz. Birden toqtatyp, patrýldik polıtseılerge habar beremiz. Olar kólikpen aıyqtyrǵyshqa alyp ketedi. Áıtpese atpen tasyp júrmeımiz ǵoı (Kúldi). Turǵyndar mal joǵalyp ketkenin de aıtady. Ylǵı bolmasa da taýyp jatamyz. Іz-túzsiz ketken adamdardy izdeıtin kezder bolady.

Odan keıin qutqarýshylarmen birlesip, órttiń aldyn alý sharalaryn júrgizemiz. Sýǵa túsýge tyıym salynǵan jaǵajaılardy da aralaımyz. Sebebi mundaı jerlerge kólikpen jetý muń. Halyqqa shomylýǵa bolmaıtynyn aıtyp, túsindiremiz. Eskertýimizge bári qulaq asady. Tyńdamaı, qarsylyq tanytqandar bolǵan emes.

Patrýldeý barysynda turǵylyqty mekenjaıy joq adamdarǵa ushyrasyp jatamyz. Qańǵybastar bireýdiń saıajaıyna kirip alǵandy jaqsy kóredi. Aty-jónin, qujattaryn suraımyz. Eger bazada joq bolsa, onda patrýldik polıtseılerge salyp jiberemiz.

Urlyq jasaıtyndardy da ustaımyz. Olar ıesiz qalǵan saıajaılarǵa, ıti joq jer úılerge túsedi. Aıyna kemi 1-2 ury anyqtalady.

- Uryny qolǵa túsirgen bir oqıǵany áńgimelep berseńiz…

- Shamamen 4 jyl buryn bolǵan oqıǵa. Áriptesimiz ratsııamen saıajaılardyń birinde kúdikti adamnyń júrgenin aıtyp qaldy. Lezde sol jerge qaraı attandyq. Bizdi kórgen álgi jigit tura qashty. Qýa kettik. Baqshadan-baqshaǵa sekirdi. Toqtaıtyn túri joq. Eki saqshy atpen sońynan qalmaı kelemiz. Áıteýir, kóp uzamaı qolǵa túsirdik. Belgili bolǵandaı, ol saıajaıǵa urlyqqa túsipti. Mas emes. Jas shamasy 30-35 aralyǵynda.

- Azannan keshke deıin attyń ústindesizder. Adam qyzyǵarlyq eken. Atqa mingenniń paıdasy kóp qoı.

- Árıne. Sol úshin basqa jumysqa aýysqymyz kelmeıdi. Atqa jıi mingen adamnyń densaýlyǵy myqty, denesi shymyr bolady. Bul - talaı aýrýdyń emi. Onyń ústine saıajaılarda qalanyń qarbalasy joq. Taza aýa, múlgigen tynyshtyq. Janyń jaı tabady. Zeınetkerlikke deıin osynda qyzmet ete bergim keledi.

- Jumysqa jastar jıi kele me?

- Bizge kóbinese attyń ústinde ósken aýyl balalary keledi. Biraq júırikke mine almaıtyndar da bolady. Olarǵa úıretip, aqyl-keńesimizdi aıamaımyz. Jastarǵa únemi «Tózimdi bolyńdar. Árdaıym sabyrlyq saqtańdar. Zańdy búge-shigesine deıin bilip, halyqpen sóıleskende sypaıy, mádenıetti bolyńdar» deımin.

- Bala-shaǵańyz bar ma?

- Áıelim ekeýimiz 2 bala tárbıelep otyrmyz. Ulym 12-de, qyzym 6-da. Jubaıym dáriger bolyp jumys isteıdi. Kenjemiz «Óskende ákem sııaqty polıtseı bolamyn» deıdi. Estigende kúlemiz. Árıne, óz tańdaýy ózinde ǵoı. Qaı salaǵa bet bursa da qoldaımyz.

- Áńgimeńizge kóp rahmet. Kásibı merekeńiz qutty bolsyn! Attan túspeńiz!