Atyraýlyqtarǵa «arzan jıhaz usynǵan» alaıaqqa sot úkim shyǵardy

<p>ATYRAÝ. KAZINFORM&nbsp;&mdash; Túrkistan oblysynyń turǵyny 2023 jyldyń aqpanynda Shymkent qalasynan arzan jıhaz usynyp, WhatsApp jelisinde mobıldi telefon nómerin qaldyrǵan. Bul jarnamaǵa atyraýlyq turǵyndar qyzyǵýshylyq tanytqan.&nbsp;</p>

Oblystyq polıtsııa departamentiniń baspasóz qyzmetinen málim etkendeı, Atyraý qalasynyń turǵyndary bank qosymshasy arqyly 6 aıǵa nesıe rásimdegen. Jarnama berýshige aldyn ala tólem retinde qomaqty qarjy aýdarǵan.

«Máselen, Atyraý qalasynyń 1957 jylǵy turǵyny Shymkent qalasynan 24 dana oryndyq aldyrýǵa tapsyrys bergen. Ol 6 aıǵa 675 myń 996 teńge nesıe rásimdep, 833 myń teńge kóleminde aýdarym jasaǵan. Alaıda, tapsyrys bergen taýar kelmeı, satýshymen baılanys úzilgen. Nátıjesinde 66 jastaǵy qala turǵynyna 1 mln 508 myń 996 teńge materıaldyq shyǵyn kelgen», — dep habarlady departamenttiń baspasóz qyzmeti. 

Atyraý oblystyq polıtsııa departamenti krımınaldyq polıtsııa basqarmasynyń qyzmetkerleri jedel izdestirý is-sharasyn júrgizgen. Kúdikti retinde Túrkistan oblysynyń 1994 jylǵy turǵynyn anyqtaǵan.

«Kúdiktiniń, dál osyndaı alaıaqtyq jolmen Atyraý qalasynyń úsh turǵynyn aldap, jábirlenýshilerdiń 4 mln teńge kóleminde aqsha qarajatyn ıemdengeni anyqtaldy. Sotqa deıingi tergeý kezinde 29 jastaǵy kúdikti óziniń qylmys jasaǵanyn tolyqtaı moıyndady. Atyraý qalasynyń № 2 sotynyń sheshimimen kúdikti qylmystyq quqyq buzýshylyqqa kináli dep tanyldy. Kúdiktige 3 jyl merzimge bas bostandyǵyn shekteý jazasy taǵaıyndaldy», - dep málim etti departamenttiń baspasóz qyzmetinen.

Eske sala ketelik, ınternet-alaıaqtarǵa atyraýlyqtar 400 mln teńge berip qoıǵanyn habarlaǵan edik.