Atyraýlyqtar 3 jylda úı qurylysyna 5 mlrd teńgege jýyq aqsha salyp, aldanyp qalǵan

<p>ATYRAÝ. KAZINFORM &ndash; Atyraýlyq úleskerler 3 jylda úı qurylysyna 5 mlrd teńgege jýyq aqsha salyp, aldanyp qalǵan.</p>

Atyraý oblystyq polıtsııa departamenti tergeý basqarmasynyń asa mańyzdy ister jónindegi aǵa tergeýshisi Muratbaı Qadyrovtyń aıtýynsha, úleskerlerge páter de berilmegen, aqshasy da qaıtarylmaǵan.

«Tergeý basqarmasynyń óndirisinde sońǵy 3 jylda turǵyn úı qurylysyna paı jáne úleskerlik qatysý arqyly páter alýǵa 500-ge jýyq turǵyn qyzyǵýshylyq tanytqan. Turǵyndar «Jibek joly», «Aqmarjan-Atyraý», «Baisanat Residence», «Saraishyq», «Qazanat», «Family Town» turǵyn úı keshenderiniń qurylysyna salymshy bolǵany anyqtaldy. Salymshylarǵa 5 mlrd teńgege jýyq materıaldyq shyǵyn keltirilgen. Úlesker bolǵan turǵyndar osy kúnge deıin qurylysy aıaqtalǵan páter nemese aqsha qarajatyn ala almaı júr. Úleskerlerdiń aldaný deregimen 6 qylmystyq is tirkeldi», -dep habarlady Muratbaı Qadyrov.

Polıtsııa departamenti Atyraý turǵyndaryna turǵyn úı keshenderinen páter alý úshin qarajat salý kezinde eskeretin birneshe keńesti usynyp otyr.

Birinshiden, turǵyn úı kesheniniń qurylysyn júrgizýge qurylys nysandaryn baqylaıtyn memlekettik organdardyń ruqsat qujaty bar-joǵyna kóz jetkizý kerek. Ekinshiden, kúmándi sharttardan bas tartqan jón.

Eske sala ketelik, Atyraýda alaıaqtyqqa baılanysty 300-ge jýyq qylmystyq is sotqa joldanǵanyn jazǵan edik.