Atyraýlyq talapkerlerge 1200 grant bólindi

<p>ATYRAÝ. KAZINFORM &mdash; H. Dosmuhamedov atyndaǵy Atyraý ýnıversıtetinde qazaqstandyq joǵary oqý oryndarynyń aýqymdy kórmesi ótip jatyr. Kórmeden qajetti aqparat alýǵa alǵashqy kúni 2000-ǵa jýyq talapker keldi.</p>

QR Ǵylym jáne joǵary bilim mınıstrligi uıymdastyrǵan kórmeniń maqsaty — QR Prezıdenti Qasym-Jomart Kemeluly Toqaevtyń tapsyrmasy boıynsha Atyraý oblysynyń jastaryna bólingen nysanaly bilim granttary jaıly aqparat berý.

«Atyraý óńirine 1200 bilim granty bólingen. Bıyl mamandyqtardyń kólemi keńeıip, bilim granttary 9 baǵytty qamtyp otyr. Atyraý óńiriniń túlekteri úshin mamandyq tańdaýdyń múmkindikteri kóbeıdi. Bul kórmeden talapkerler mamandyqty qalaı tańdaý kerek ekeni jaıly da bile alady. Árbir joǵarǵy oqý orny týraly tolyqqandy málimet beriledi», — dedi mınıstrdiń keńesshisi Rýslan Emelbaev.

Bıyl Ǵylym jáne joǵary bilim mınıstrligi batys, halyq tyǵyz qonystanǵan jáne jańadan qurylǵan óńirlerdiń talapkerleri úshin 5000 grant bólinip otyr.

Atyraýda ótken kórmede «Grant túrleri jáne talapkerdiń jol kartasy» taqyrybyndaǵy kásibı baǵdar berý semınary da ótti.

Onda bilikti mamandar talapkerlerge mamandyqty sátti tańdaýdyń jolyn kórsetip, naryqtaǵy suranysqa ıe salalar týraly keńes berdi.

Uıymdastyrýshylar ulttyq biryńǵaı testileýde 125 balldan joǵary upaı jınaǵan túlekterge syılyq tabystady.

Mınıstrlik 16-17 mamyr kúnderi ótetin kórme aıasynda «Joǵarǵy bilim kórmesi» atty arnaıy forýmyn ótkizýdi josparlap otyr.