Atyraýlyq sýretshi Ispanııadaǵy halyqaralyq baıqaýdyń birinshi júldesin ıelendi

<p>Atyraýlyq sýretshi Nazerke Işanova Ispanııada ótken halyqaralyq baıqaýdyń birinshi júldesin ıelendi. Ol saltanatty marapattaý rásimine shaqyrtý aldy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Nazerke Işanova «Atyraý-Aqparat» JShS-da baspa dızaıneri bolyp jumys isteıdi. Túrli kartınany elektrondy qalammen planshetke salady. Bıylǵy qyrkúıekte Ispanııada ótken sýretshilerdiń «Ýsy Dalı» baıqaýynyń «Digital Painting» nomınatsııasyna óz týyndysyn jibergen. 

Foto: N.Işanovanyń jeke muraǵatynan

«Bul baıqaýǵa jahannyń 60 elinen 150 sýretshi qatysty. Men 26-35 jas aralyǵyndaǵy úmitkerler tobyna «Vse nachınaetsıa s ınıtsıatıvy odnogo cheloveka» atty sýretimdi jibergen edim. Qazan aıynyń basynda sýrettiń tekserilgeni, baıqaýǵa qabyldanǵany týraly habar aldym. Al keshe halyqaralyq konkýrs qorytyndysy boıynsha birinshi júldeni ıelengenimdi habarlady», - deıdi Nazerke Işanova.

Halyqaralyq baıqaýdyń saltanatty marapattaý sharasy Ispanııanyń Kosto-Brava kýrortty aımaǵynda aldaǵy jyldyń naýryz-sáýir aıynda ótedi. Atyraýlyq sýretshi atalǵan sharaǵa shaqyrtý aldy. 

Qazir onyń jeke qorynda 50-den astam tarıhı kartına bar. Tarıhı shyǵarmalardy oqyǵandy, ult zııalylary men batyrlarynyń, Alash arystarynyń ómirin, eńbegin zerttegendi unatady.

Eske sala ketelik, budan buryn atyraýlyq dızaıner Londonda halyqaralyq baıqaýdyń birinshi júldesin ıelengenin habarlaǵan bolatynbyz.

Byltyr «Munar kún» kartınasy London qalasynda ótken «Altyn talanttar ýaqyty» halyqaralyq baıqaýynyń birinshi júldesin ıelendi. Bul baıqaý 2007 jyldan beri turaqty ótedi.