Atyraýlyq oqýshy «mektepke bomba qoıyldy» dep jalǵan habar bergen

<p>Atyraý oblysynda 9-synyp oqýshysynyń mektepte jarylǵysh zat qoıylǵany týraly jalǵan habar bergeni anyqtaldy. Ol jalǵan habardy arazdasyp qalǵan qurdasynyń atynan joldaǵan, dep habarlaıdy Kazinform.</p>

Atyraý oblystyq polıtsııa departamentiniń baspasóz qyzmetinen málim etkendeı, jasóspirimniń Jylyoı aýdanyndaǵy orta mektepte oqıtyny anyqtalǵan.

«Ekstremızmge qarsy is-qımyl basqarmasynyń qyzmetkerleri UQK departamentiniń terrorızmge qarsy ortalyǵymen birge Jylyoı aýdanynyń mektebinde jarylǵysh zat týraly jalǵan habar bergen mekteptiń 9-synyp oqýshysyn anyqtady. Jasóspirim Telegram-chatta qurdasymen áńgimelesý kezinde arazdasyp qalǵan. Sodan soń messendjerde anonımdi akkaýnt ashyp, qurdasynyń atynan dabyl sıgnalyn joldaǵan», -dep habarlady departamenttiń baspasóz qyzmeti.

Qazir atalǵan derekke baılanysty QR Qylmystyq kodeksiniń 273-babymen (Terrorızm aktisi týraly kórineý jalǵan habarlaý) qylmystyq is qozǵaldy. Oqýshynyń ata-anasyna qatysty QR Ákimshilik quqyq buzýshylyqtar týraly kodekstiń 127-babymen (Kámeletke tolmaǵan adamdy tárbıeleý jáne (nemese) oǵan bilim berý, onyń quqyqtary men múddelerin qorǵaý jónindegi mindetterdi oryndamaý) ákimshilik is qujaty jınaqtaldy.

Eske sala ketelik, budan buryn Mektepte bomba baryn habarlaǵan atyraýlyq psıhıatrııalyq stantsıonarǵa jatqyzylǵanyn habarlaǵan edik.

Sot-psıhıatrııalyq saraptamanyń qorytyndysyna saı atalǵan azamat «Paranoıdty shızofrenııa úzdiksiz aǵyn túri, turaqty aqaýmen» sozylmaly psıhıkalyq buzylýymen aýyratyny rastalǵan. Kúdikti QR Qylmystyq kodekstiń 273-babynda kózdelgen qylmystyq quqyq buzýshylyqty jasaǵany úshin qylmystyq jaýaptylyqtan bosatyldy. Oǵan Atyraý oblystyq psıhıkalyq densaýlyq ortalyǵynyń jalpy úlgidegi psıhıatrııalyq statsıonarda májbúrlep emdeý taǵaıyndaldy.