Atyraýlyq qutqarýshylar tútindegen páterden 8 aılyq sábıdi alyp shyqty
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 6 maýsymda 6-qabattaǵy páterden tútin shyqqany týraly habar túsken.
«Atyraý qalasynyń Sultan Beıbarys dańǵylynda ornalasqan kópqabatty úıdegi páterdiń terezesinen tútin shyǵyp jatqany týraly shaqyrtý tústi. Órt sóndirý bólimshesi shaqyrtý ornyna jedel jetip, 6-qabattaǵy páterdi tútin basqanyn anyqtady. Páterdiń esigi qulyptaýly bolǵan. Sol sebepten, azamattyq qorǵaý serjanty B.Saıasatovtyń basqarýymen avtosatymen joǵaryǵa kóterildi. Terezeden kirgen qutqarýshynyń biri, azamattyq qorǵaý aǵa serjanty A.Qurmanııazov tútin basqan bólmeden 8 aılyq sábıdi qalyń kórpege orap, qaýpisiz aýmaqqa alyp shyqty», - dep habarlady departamenttiń qoǵammen baılanys toby.
Apattar medıtsınasy ortalyǵynyń qyzmetkerleri balaqaıdy tekserip, alǵashqy medıtsınalyq kómek kórsetti. Qutqarýshylardyń jedel is-áreketiniń nátıjesinde órtke ulasýyna jol berilgen joq. Atalǵan shaqyrtýǵa oblystyq tótenshe jaǵdaılar departamenti men apattap medıtsınasy ortalyǵynan 13 qyzmetker, 4 tehnıka tartyldy.
«Páterdegi tútin as bólmeden shyqqan. Sol kezde páterde 8 aılyq sábı jalǵyz qalǵany anyqtaldy. Osyǵan baılanysty oblys turǵyndary men qonaqtaryna páterdegi órt qaýipsizdigi erejelerin qatań saqtaýdy eskertemiz», - dep málim etti departamenttiń qoǵammen baılanys tobynan.
Eske sala ketelik, buǵan deıin Atyraýda órtengen úıden 84 jastaǵy keıýana men balasy qutqarylǵan edi.