Atyraýlyq qutqarýshylar tasqyn sýdyń ortasynan 270 jylqyny qaýipsiz jerge shyǵardy
Qazir Atyraý qalasynyń mańynda Jaıyq ózeninen jaıylmaǵa shyqqan tasqyn sý áli saqtalyp tur. Sondaı tasqyn sý Qaıyrshaqty aýyldyq okrýgindegi Besikti aýylynyń tusynda bar.
Atyraý oblysynyń tótenshe jaǵdaılar departamenti qoǵammen baılanys tobynyń málimetinshe, atalǵan aýyldyń turǵyndary jylqylardy qaýipsiz jerge shyǵarý úshin júgingen.
«Departamenttiń dıspetcherlik pýltine atalǵan aýyldan jylqylardyń jaıylmadaǵy tasqyn sýdyń ortasynda qalyp qoıǵany jóninde shaqyrtý tústi. Qutqarýshylar shaqyrtý ornyna jedel jetip, 70 bas jylqyny qaýipsiz jerge shyǵardy. Sonymen qatar, qutqarýshylar Atyraý qalasyna jaqyn ornalasqan Teńdik aýylynyń tusyndaǵy tasqyn sýdyń ortasynan 200 jylqy qaýipsiz aýmaqqa aıdaldy», -dep habarlady departamenttiń qoǵammen baılanys toby.
Jylqylardy qaýipsiz jerge shyǵarýǵa tótenshe jaǵdaılar departamentinen 10 qutqarýshy, 2 tehnıka, 2 júzý quraly tartyldy.
Eske sala ketelik, budan buryn Jaıyq ózeniniń deńgeıi Atyraý tusynda da tómendeı bastaǵanyn habarlaǵan bolatynbyz.