Atyraýlyq dárigerler kólikte jalǵyz bolǵan 1 jasar balany ólimnen aman alyp qaldy
Atyraý oblystyq Densaýlyq saqtaý basqarmasy baspasóz qyzmetiniń aqparatyna súıensek, oqıǵa 10 maýsymda bolǵan.
«Anasy kólikte 1 jasar balasyn qaldyryp ketken. Kólikke qaıta oralǵanda, balasy es-tússiz jatqanyn kórgen. Sol sebepten, balasyn jaqyn mańdaǵy perzenthanaǵa aparǵan. Perzenthanaǵa jedel járdem brıgadasy jedel jetti. Medıtsınalyq tekserý kezinde balanyń terisi qyzaryp, isingeni anyqtaldy. Dene qyzýy 40 gradýstan asyp, júrek soǵysy jıilegen. Qaltyraý belgisi baıqalǵan», - deıdi oblystyq jedel medıtsınalyq járdem stantsııasy dırektorynyń orynbasary Nargız Abdrahmanova.
Onyń aıtýynsha, perzenthananyń neonatolog-dárigerleri alǵashqy medıtsınalyq kómek kórsetken. Al, jedel járdem brıgadasynyń feldsherleri Ǵalı Zınýllaev pen Aıgúl Bısenbıeva reanımatsııalyq is-sharany jalǵastyrǵan.
«Bir jasar balanyń ómirin saqtap qalý úshin qosymsha pedıatrııalyq brıgada jiberildi. Pedıatrııada halyqaralyq standarttarǵa sáıkes jetildirilgen júrek-ókpe reanımatsııasynyń ádisterin qoldaný men kásibı daǵdylardy kórsetýdiń, úılesimdi ujymdyq jumystyń nátıjesinde balanyń ómirin saqtap qala aldyq. Biraq ata-analarǵa balalaryn aptap ystyqta kólikte qaldyrýdyń qaýipti ekenin eskertkimiz keledi», - dedi Nargız Abdrahmanova.
Eske sala ketelik, budan buryn Atyraýda 5 jasar balanyń júregi úsh ret toqtap qalǵanyn habarlaǵan edik.