Atyraýdyń Reseımen shekaradaǵy aýdanynda úsh medıtsınalyq pýnkt ashyldy

<p>Atyraý oblysynyń Reseı Federatsııasymen shekarada ornalasqan Qurmanǵazy aýdanynda bir kúnde úsh medıtsınalyq pýnkt qoldanysqa berildi, dep habarlaıdy <a href="Atyraý%20oblysynyń%20Reseı%20Federatsııasymen%20shekarada%20ornalasqan%20Qurmanǵazy%20aýdanynda%20bir%20kúnde%20úsh%20medıtsınalyq%20pýnkt%20qoldanysqa%20berildi,%20dep%20habarlaıdy%20Kazinform." target="_blank" rel="noopener">Kazinform.</a></p>

Atyraý oblysy ákiminiń orynbasary Qaırat Nurtaevtyń aıtýynsha, Qurmanǵazy aýdanynda ashylǵan 25 oryndyq úsh medıtsınalyq pýnkttiń ǵımaraty «Aýyldyq densaýlyq saqtaýdy jańǵyrtý» ulttyq jobasy aıasynda salynǵan. Bul nysandarda Altynshy, Shaǵyrly, Kadyrka aýyldarynyń turǵyndaryna medıtsınalyq kómek kórsetiledi.

«Memleket basshysynyń tapsyrmasyna sáıkes, aýyldyq densaýlyq saqtaý salasyn damytýdyń baǵdarlamasy bekitildi. Soǵan oraı Atyraý oblysynda birneshe medıtsınalyq nysannyń qurylysy bastalǵan edi. Bıyl Qurmanǵazy aýdanynyń shalǵaıdaǵy eldi mekenderinde úsh nysan ashylyp otyr. Máselen, Altynshy, Shaǵyrly, Kadyrka aýyldarynyń turǵyndary buryn medıtsınalyq kómekti alý úshin aýdan ortalyǵyna nemese Atyraý qalasyna barýǵa májbúr bolatyn. Endi olar medıtsınalyq kómekti aýyldaǵy jańa pýnktte alady», - dedi Qaırat Nurtaev.

Aýyldardaǵy medıtsınalyq pýnkttiń jalpy aýdany – 266,35 sharshy metr. Munda egý, materıal jınaý, perforatsııalyq zertteý, dezınfektsııalyq zattardy daıyndaý jáne saqtaýǵa arnalǵan qurylǵylarmen jabdyqtalǵan. Sondaı-aq dárihana, tehnıkalyq qyzmetkerler men medbıkelerge arnalǵan bólmeler bar.

Eske sala ketelik, buǵan deıin Qulsary qalasynda úsh jyl salynǵan 75 oryndyq aýrýhana ashylǵanyn habarlaǵan bolatynbyz.