Atyraýdyń Mahambet aýdanynda Jaıyq ózeniniń jaıylmasyna sý shyqty
Atyraý oblysynyń jedel shtabynan málim etkendeı, búgin Mahambet aýdanyndaǵy 17 ýchaskege qarǵyn sýdyń jaıylǵany tirkelip otyr.
«Mahambet aýdany ákimdiginiń málimetinshe, jyl saıyn sý Jaıyq ózeniniń jaıylmasyna 9 mamyrdan buryn kelmeıtin edi. Bıyl qarǵyn sý ádettegiden eki apta buryn keldi. Qazir Jaıyq ózeninen Tólep-Qarasý, Qorjyn, Almaǵambet, Ólishyǵanaq, Gagýshkın, Qyzyljar, 15-aýyl, 13-aýyl, Petrýshkın, 12-aýyl, 9-aýyl, Qarashyǵanaq, Kishi Qarashyǵanaq, 8-aýyl, Baqsaı, Glýhoı jáne Sbornyı jaıylmasyna qarǵyn sýdyń shyqqany tirkeldi», - dep habarlady oblystyq shtabtan.
Mahambet aýdandyq kásipkerlik jáne aýyl sharýashylyǵy bóliminiń basshysy Oljas Myrzabaevtyń málimetine súıensek, jeke ıeliktegi maldy shyǵarý úshin 17 qaýipsiz aýmaq belgilengen.
«Bizdiń aýdanda 50 myńǵa jýyq mal bar. Qaýipti aýmaqtarda kóktemgi egis jumystarymen aınalysatyn 46 sharýa qojalyǵynyń basshylaryna aldyn ala eskertý berildi. Qazir qaýipsiz aıýaqtarǵa 4 myńnan astam mal aıdaldy. Qaýipsiz aýmaqtardyń marshrýty men kartasy aýyldyq okrýg ákimderi, aýdandyq jer qatynastary bólimi jáne aýyl aqsaqaldarymen birlesip ázirlendi», - dep málim etti Oljas Myrzabaev.
Eske sala ketelik, budan buryn Atyraý oblysynyń BQO-men shekaradaǵy Baǵyrlaı kanalyna mol sý kelgenin jazǵan edik.
Keıin Inder aýdanynda 7 myńǵa jýyq mal qaýipsiz aýmaqqa shyǵaryldy.