Atyraýdyń Mahambet aýdanyna 30 tonna gýmanıtarlyq kómek jetkizildi
Mahambet aýdanyndaǵy gýmanıtarlyq kómek shtabynyń jetekshisi Jeksenbaı Pazýlovtyń málimetinshe, osy kezge deıin 30 tonna gýmanıtarlyq kómek qory jınaqtalǵan.
«Kúndelikti turmysqa qajetti zattar men búlinbeıtin ónimder Atyraý qalasynan jetkizilip jatyr. Bir aıda shtabqa jetkizilgen 30 tonna gýmanıtarlyq kómektiń arasynda 100 kılo kıim bar. Gýmanıtarlyq júk aýdanǵa aptasyna eki ret jetkiziledi. Biz júkti ózimiz túsiremiz. Azyq-túliktiń jaramdylyq merzimin tekseremiz. Túrine baılanysty suryptaımyz. Jınaqtalǵan qorda birinshi kezekte tutynatyn qutydaǵy sý, un, kúnbaǵys maıy, qaraqumyq, sábılerge arnalǵan gıgıenalyq jórgekter jáne basqa da qajetti zattar bar», -dedi Jeksenbaı Pazýlov.
Eske sala ketelik, budan buryn Mahambet aýdanynda Jaıyq ózeniniń deńgeıi 8 metrden asyp ketkenin habarlaǵan bolatynbyz.
Sondaı-aq, Mahambet aýdanynyń jedel shtaby kúsheıtilgen jumys rejımine kóshkenin jazǵan edik.