Atyraýdyń Isataı aýdanynda dárigerler dınastııasy daýys berdi

<p>Atyraý oblysynyń Isataı aýdanynda dárigerler dınastııasy &ndash; Ábejanovtar áýleti daýys berýge keldi. Bul áýlette medıtsına salasynyń 11 ókili bar, dep habarlaıdy <a href="Kazinform" target="_blank" rel="noopener">Kazinform</a>.</p>

Isataı aýdanynda 15 saılaý ýchaskesi bar. Bul ýchaskelerde 15 883 saılaýshy tirkelgen. Aýdan ortalyǵy – Aqqystaý aýylyndaǵy №133 saılaý komıssııasynyń tóraǵasy Erbolat Nasımýllınniń málimetinshe, munda 1 203 saılaýshy daýys beredi.

Saılaýshylardyń tiziminde medıtsına salasynyń ardageri Qadyrjan Ábejanovtyń otbasy da bar. Uzaq jyl aýdandyq jedel járdem brıgadasynda feldsher qyzmetin atqarǵan zeınetker daýys berýge zaıybyn, bala-kelinin, nemerelerin erte keldi.

Onyń zaıyby Meńsulý Esenǵalıeva rentgent medbıkesi bolyp jumys istegen. Al, uly Jeńisbek aýdandyq ortalyq aýrýhananyń hırýrg-dárigeri, kelini Márııam Sergeıqyzy ýchaskelik dáriger retinde turǵyndar densaýlyǵyn saqtaýǵa úles qosyp júr.

– Elimiz táýelsizdigin alǵannan beri birneshe ret Prezıdent, Parlament Májilisiniń saılaýy ótti. Al, alǵash ret aýdan ákiminiń saılaýyn eldegi demokratııalyq úrdistiń jemisi retinde baǵalaý qajet. Óıtkeni, halyq saılaǵan aýdan ákimine júkteletin jaýapkershiliktiń júgi jeńil emes. Sol sebepten, búgin úmitkerlerdiń iskerligi, uıymdastyrýshylyǵy eskerilýge tıis. Jańa ákim buqaranyń áleýmettik turmysyn jaqsartý, ásirese, jumyssyzdyqty azaıtý, aýyldardy ınfraqurylymmen qamtý, qum kóshkininen qorǵaý sekildi túıindi máselelerge kóńil bólýi kerek, - deıdi Qadyrjan Ábejanov.

Eske sala ketelik, buǵan deıin Atyraý oblysynyń eki aýdanynda 34 487 saılaýshy daýys beretinin habarlaǵan edik.