Atyraýdyń Inder aýdanynda 7 myńǵa jýyq mal qaýipsiz aýmaqqa shyǵaryldy

<p>ATYRAÝ. KAZINFORM &ndash; Atyraý oblysynyń Inder aýdanynda 7 myńǵa jýyq mal qaýipsiz aýmaqqa shyǵaryldy.</p>

Atyraý oblysynyń jedel shtabynan málim etkendeı, Inder aýdanynda sý tasqynyna baılanysty arnaıy karta ázirlengen.

Inder aýdandyq aýyl sharýashylyǵy bóliminiń bas mamany Abaı Ábdirovtyń deregine súıensek, jeke ıeliktegi tórt túlikti qaýipsiz aýmaqqa kóshirý jumystary jalǵasyp jatyr.

«Jeke ıeliktegi maldy kóshirý jumystaryn Inder aýdandyq aýyl sharýashylyǵy bólimi men aýyldyq okrýgter ákimdiginiń mamandary úılestirip otyr. Maldy kóshirý úshin qaýipsiz aýmaqtardyń koordınaty belgilendi. Osy kezge deıin arnaıy belgilengen qaýipsiz oryndarǵa 5 myńnan astam qoı-eshki, 1 myń 700 iri qara kóshirildi», -deıdi Abaı Ábdirov.

Eske sala ketelik, budan buryn Atyraý oblysynyń BQO-men shekaradaǵy Baǵyrlaı kanalyna mol sý kelgenin habarlaǵan bolatynbyz.