Atyraýdyń eks-ákiminiń isi: Sheneýnikterge taǵylǵan qandaı aıyptaýlar rastalmady
Ákimdiktiń burynǵy laýazymdy basshylaryna qatysty qylmystyq is Atyraý qalasyndaǵy №2 sotynda qaraldy.
Sot materıaldaryna qaraǵanda, qylmystyq qýdalaý organdary tergeýiniń qorytyndysymen eks-ákim men burynǵy bólim basshylary birneshe bappen aıyptalǵan.
Máselen, qala ákimi Qaırat Orazbaevqa QR Qylmystyq kodeksiniń 361-babynyń 4-bóliginiń 3-tarmaǵy (Laýazymdyq ókilettikterdi teris paıdalaný), 369-babynyń 3-bóligi (Qyzmettik jalǵandyq jasaý) boıynsha; qalalyq jer qatynastary bóliminiń basshysy Naýryzbek Qumarovqa, ákim apparaty bóliminiń basshysy Jiger Ibatollauly men sáýlet jáne qala qurylysy bóliminiń basshysy Erlan Qabdınovke 361-babynyń 4-bóliginiń 3-tarmaǵy (Laýazymdyq ókilettikterdi teris paıdalaný), 369-babynyń 1-bóligimen (Qyzmettik jalǵandyq jasaý), 190-babynyń 4-bóliginiń 2-tarmaǵymen (Alaıaqtyq) aıyp taǵylǵan.
– Sot talqylaýynyń qorytyndysynda mynadaı jaıttar anyqtaldy. Qaırat Orazbaev qala ákimi bola tura, jer qatynastary bóliminiń basshysy Naýryzbek Qumarovqa, sáýlet jáne qala qurylysy bóliminiń basshysy Erlan Qabdınovke rekreatsııalyq aımaqtaǵy 8 jer ýchaskesin berý týraly tapsyrma bergen. Sottalýshylar Naýryzbek Qumarrov pen Erlan Qabdınov ózara sóz baılasyp, rekreatsııalyq jáne sanıtarlyq aımaqtardaǵy 18 jer ýchaskesin bergen. Bul úshin Naýryzbek Qumarov jer komıssııasynyń hattamasynyń qosymshasyna komıssııa otyrysynda qaralǵan dep 18 ótinish týraly jalǵan málimetter engizgen, -dep habarlady sottyń baspasóz qyzmeti.
Alaıda birneshe aıyptaý rastalmady. Birinshiden, Jiger Ibatollauly qyzmettik ókilettikterdi asyra paıdalandy degen aıyppen onyń osy qylmysty jasaýǵa qatysy bar ekendigi týraly jetkilikti dálelder usynylmaǵan. Onyń qyzmettik ókilettigine rekreatsııalyq jáne sanıtarlyq aımaqtardaǵy jer ýchaskelerin berý máselesi kirmegen.
Ekinshiden, Qaıra Orazbaev pen Jiger Ibatollaulyna taǵylǵan aıyptaýda qandaı qujattarǵa (jer ýchaskesin tańdaý aktileri, jer komıssııasynyń hattamalary jáne t.b.) jalǵan málimetter nemese túzetýler engizilgeni naqtylanbaǵan.
Úshinshiden, atalǵan sottalýshylarmen qujattarǵa jalǵan málimetter engizilý faktileri anyqtalmaǵan.
Tórtinshiden, qylmystyq qýdalaý organymen múlikti jymqyrý dálelderi usynylmaǵan. Sottalýshylardyń birdeı áreketteri ókilettikterdi teris paıdalaný jáne alaıaqtyq retinde ártúrli baptar boıynsha dárejelengen.
– Qaırat Orazbaev pen Erlan Qabdınov QR Qylmystyq kodeksiniń 361-babynyń 4-bóliginiń 3-tarmaǵymen (Laýazymdyq ókilettikterdi teris paıdalaný) kináli dep tanyldy. Erlan Qabdınovke 5 jyl merzimge bas bostandyǵyn shekteý, Qaırat Orazbaevqa taǵylǵan aıyptyń az kólemi eskerilip, 3 jyl merzimge bas bostandyǵyn shekteý túrindegi jaza taǵaıyndaldy. Naýryzbek Qumarov 361-baptyń 4-bóliginiń 3-tarmaǵymen (Laýazymdyq ókilettikterdi teris paıdalaný) jáne 369-babynyń 1-bóligimen (Qyzmettik jalǵandyq jasaý) kináli dep tanylyp, oǵan 6 jyl merzimge bas bostandyǵyn shekteý túrindegi jaza berildi. Olar ómir boıyna memlekettik qyzmette laýazymdardy atqarý quqyǵynan aıyryldy, -dep málim etti sottan.
Al Jiger Ibatollauly QR Qylmystyq kodeksiniń 361-babynyń 4-bóliginiń 3-tarmaǵy boıynsha onyń áreketterinde qylmystyq quqyq buzýshylyq quramynyń bolmaýyna baılanysty aqtaldy.
Sondaı-aq Qaırat Orazbaev, Erlan Qabdınov pen Jiger Ibatollauly 369-babynyń 1-bóligi boıynsha, Erlan Qabdınov, Naýryzbek Qumarov jáne Jiger Ibatolauly 190-babynyń 4-bóliginiń 2-tarmaǵynda kózdelgen qylmystyq quqyq buzýshylyq quramynyń bolmaýyna baılanysty aqtaldy.
Sot úkimi zańdy kúshine engen joq.
Eske sala ketelik, buǵan deıin Atyraý qalasynyń eks-ákimi Qaırat Orazbaevtyń isine qatysty sot úkimi shyqqanyn jazǵan edik.