Atyraýdy sýmen qamtý tolyq qalpyna keltirildi

<p>Atyraý qalasyndaǵy, oǵan taıaý ornalasqan eldi mekender men Maqat aýdanynyń tutynýshylaryna sýyq sý berildi. Qazir sý qubyryndaǵy qysym qalpyna keltirilgen, dep habarlaıdy Kazinform.</p>

«Atyraý oblysy Sý Arnasy» kommýnaldyq memlekettik kásipornynyń basshysy Meıirim Qalaýıdiń aıtýynsha, 10 jeltoqsanda jergilikti ýaqytpen saǵat 16:00 shamasynda tutynýshylarǵa sý berile bastaǵan. Al, saǵat 19:00-de qubyrdaǵy qysymdy qalpyna keltirý aıaqtalǵan.

«Sý tazartý qondyrǵylaryn jóndeý, tazartý jumystary 9 jeltoqsan kúni keshke bastaldy. Kásiporynnyń jumysshylary men arnaıy mekemeniń súńgýirleri aýa raıynyń qolaısyzdyǵyna qaramastan úzilissiz jumys istedi. Olar barlyq sý tazartý qondyrǵysyn muzdan tolyq tazartty. Qazir kásiporynnyń sý tartý qurylǵylary shtattyq rejımde jumys istep tur», - dep habarlady Meıirim Qalaýı.

Sýmen qamtý kásiporny mamandarynyń túsindirýinshe, sýdyń quramy tazarǵan saıyn qubyrdaǵy qysym artady. Bul birneshe saǵatqa sozylýy múmkin.

Eske sala ketelik, Jaıyq ózeni qatyp, Atyraý sýsyz otyrǵanyn, ákimdikte komıssııa qurylǵanyn jazǵan bolatynbyz.

Sondaı-aq, «Atyraý oblysy Sý Arnasy» ókili Jaıyqta muzdyń tyǵyz massasy 20 jyldan beri bolmaǵanyn aıtqan edi.

«Atyraý oblysy Sý Arnasy» KMK sý tazartý qondyrǵylarynyń basshysy Borıs Penkınniń aıtýynsha, ózende qalyń muz qatqan. Mundaı qubylys shamamen 20 jyldan beri baıqalmaǵan.

«Bıyl Jaıyq ózeninde sý deńgeıiniń kúrt tómendegeni baıqaldy. Máselen, keshe, 9 jeltoqsanda keshki birneshe saǵatta sý deńgeı 15-20 sm-ge tómendedi. Usaq muz krıstaldary sý jınaıtyn jabdyqqa ornatylǵan qorǵanys torlaryn bitep tastady», - dep málim etti Borıs Penkın.