Atyraýdan Reseıdiń shekarasyna deıingi joldyń bir bóligi jabyldy

<p>Atyraý oblysynda kún buzyldy. Osyǵan baılanysty Isataı aýdanyndaǵy Janbaı aýylynyń tusynan Reseı Federatstsııasynyń Astrahan oblysymen shekaraǵa deıingi jol bóligi jabyldy, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«QazAvtoJol» AQ Atyraý oblystyq fılıalynyń bólim basshysy Qýanyshbek Shortabaevtyń aıtýynsha, búgin, 16 jeltoqsanda saǵat 11:30-da atalǵan jol bóliginde kólik qozǵalysyna shekteý qoıýǵa sheshim qabyldanǵan.

«Jol bóliginiń jabylýyna aýa raıynyń buzylǵany, jańbyrdan keıingi kóktaıǵaq sebep bolyp otyr. Osyǵan baılanysty «Aqtóbe-Atyraý-Reseı Federatsııasynyń shekarasy» (Astrahan baǵyty) tas jolynyń 712-893 shaqyrymy aralyǵyndaǵy jol jabyldy. Joldyń bul bóligi Isataı aýdanyndaǵy Janbaı aýylynyń tusynan bastalyp, Reseıdegi Astrahan oblysymen shekaraǵa deıingi aralyqty qamtıdy», -dep habarlady Qýanyshbek Shortabaev.

Onyń aıtýynsha, «QazAvtojol» AQ jáne «Jol aktıvteriniń ulttyq sapa ortalyǵy» RMK-nyń Atyraý oblystyq fılıaldarynyń mamandary birlese jumys atqarýdy qolǵa alǵan. Oǵan «QAJservıs» JShS ókilderi qosylǵan.

«Búgin Atyraý oblysynda aýa temperaýrasy -8-10 gradýstyń aralyǵynda. Kún bultty. Qurmanǵazy aýdanynda jańbyr, Mahambet aýdanynda qar jaýdy. Qurmanǵazy aýdanyndaǵy jolda jańbyrdyń saldarynan kóktaıǵaq bar. Qazir «Aqtóbe-Atyraý-Reseı Federatsııasynyń shekarasy» (Astrahan baǵyty) tas jolynyń 712-893 shaqyrymy aralyǵynda 10 adam jumys istep jatyr. Arnaıy 6 tehnıka tartyldy. Jolǵa bir táýlikte 18 tekshe metr ınertti materıal sebildi», -dep málim etti Qýanyshbek Shortabaev.