Atyraýdan Aqtaýǵa ushatyn áýe reısiniń keshigýine ne sebep bolǵan
FlyArystan kompanııasynyń málimetine qaraǵanda, Atyraý-Aqtaý baǵytyndaǵy KC7277 áýe reısi kestege sáıkes 2 qarashada saǵat 06:40-ta ushýy tıis edi. Alaıda, áýe kompanııasy Aqtaý qalasyndaǵy aýa raıyna baılanysty reısti keıinge qaldyrýǵa májbúr bolǵan. Áýe kompanııasynyń ókilderine habarlasqan jolaýshylar sýsynmen, ystyq tamaqpen qamtylyp, qonaqúıde ornalastyrylǵan.
«Aqtaýdan Ystambulǵa jalǵasatyn reısti ótkizip alǵan jolaýshylar aqshasyn tolyq qaıtaryp alý nemese tegin qaıta brondaý múmkindigine ıe boldy. Ushaq 2 qarasha kúni saǵat 21:50-de ushty. Aqtaý qalasyndaǵy aýa raıy jaǵdaıyna baılanysty (atap aıtqanda, qoıý tuman jáne sáıkesinshe kórý múmkindigi tómen) ushaqty qondyrý múmkin bolmady. Sol sebepten, Atyraý qalasyna oralý týraly sheshim qabyldandy», - dep túsindirdi kompanııa ókilderi.
Al, ekinshi reıs 3 qarashada saǵat 06:50-de ushqan. Biraq, Aqtaýdaǵy qolaısyz aýa raıyna baılanysty ushaq Atyraýǵa qaıta oralǵan.
«Keshigý kezinde jolaýshylar sý jáne ystyq tamaqpen qamtamasyz etildi. Ótinish boıynsha qonaqúıde turý jáne turǵyn úı qunynyń ótemaqysyna kepildik hattar berildi. Reıstiń josparlanǵan ushyp shyǵý ýaqyty – saǵat 17:30. Kez kelgen qolaısyzdyq úshin jolaýshylardan keshirim suraımyz. Aýa raıynyń qubylýy reısterdiń keshigýiniń baqylanbaıtyn sebebi ekenin eske salamyz. Qaýipsizdik – FlyArystan áýe kompanııasynyń basty basymdyǵy», - dep naqtylady kompanııanyń baspasóz qyzmeti.
Eske sala keteıik, buǵan deıin FlyArystan basshysynyń balanyń áýejaıda qalyp qoıý oqıǵasyna qatysty keshirim suraǵanyn jazǵan edik.