Atyraýda kameralardyń kómegimen 11 aıda 312 qylmys anyqtalǵan

<p>ATYRAÝ. KAZINFORM — Atyraý qalasynyń kóshelerine 3506 beınebaqylaý kamerasy ornatylǵan. Kóshelerge ornatylǵan kameralarmen 11 aıda 312 qylmys, 23,9 myń quqyq buzýshylyq anyqtalyp otyr.</p>

Atyraý oblystyq polıtsııa departamenti baspasóz qyzmetiniń málimetinshe, quqyq buzýshylardyń urlyq, usaq urlyq, buzaqylyq áreketteri kamera túsip qalǵan. 

— Jedel basqarý ortalyǵy — adamdar kóp jınalatyn oryndardy baqylaýǵa, jaıaý polıtsııanyń jáne avtopatrýlderiniń is-qımylyn úılestirýge múmkindik beretin qurylǵy. Ortalyq qyzmetkerleri beınebaqylaý júıesin tıimdi paıdalanyp, jyl basynan bergi 11 aıda 23 myń 978 quqyq buzýshylyqtyń anyqtalýyna atsalysty. Túrli sanattaǵy 312 qylmys anyqtalyp otyr. Kóshelerdegi kameralarmen anyqtalǵan qylmystardyń arasynda urlyq, usaq urlyq, buzaqylyq bar. Kamera arqyly jıi tirkeletin ákimshilik quqyq buzýshylyqtardyń biri — alkogoldik ishimdikterdi paıdalanǵan kúıde kólik júrgizý, kóshede, qoǵamdyq oryndarda mas kúıinde júrý, — dep habarlady departamenttiń baspasóz qyzmeti.

Sondaı-aq, «Interceptor» júıesi arqyly ákimshilik aıyppuldardy tólemeı júrgen 3876 boryshker ustalǵan. Al arnaıy turaqqa boryshkerlerdiń 1333 kóligi qoıylǵan. 
Al «Sergek-Qorǵaý» júıesimen 28945 quqyq buzýshylyq tirkelgen. Aıyppulǵa qatysty 19477 nusqama berilgen.

Eske sala keteıik, buǵan deıin Atyraýda esirtki tasymaldaǵan 60 adamnyń arasynda 9 áıel, 3 jasóspirim bolǵanyn jazǵan edik.