Atyraýdaǵy túrmede qaraqshylyq qylmysymen sottalǵan 33 adam otyr

<p>ATYRAÝ. KAZINFORM &mdash; Atyraý oblysynda ótken jyly asa aýyr qylmys sanatyna jatatyn 7 qaraqshylyq shabýyl jasalǵan. Polıtsııa qyzmetkerleri kúdiktilerdiń bári ustap, qylmystyń izin sýytpaı ashty.</p>

Atyraý oblystyq polıtsııa departamentiniń baspasóz qyzmetinen málim etkendeı, adamdy tonaý men qaraqshylyq shabýyl jasaý aýyr jáne asa aýyr qylmystar sanatyna jatqyzylǵan.

«Tonaý – bul bóten múlikti ashyq urlaý, al, qaraqshylyq – bóten múlikti urlaý maqsatynda adamnyń ómiri men densaýlyǵyna zaqym keltirip, qorqytýmen ushtasqan shabýyl jasaý áreketi. Atyraý oblysynda ótken jyly 7 qaraqshylyq deregi tirkelip, barlyǵy ashyldy. Onyń ishinde mıkro-qarjy keńesi men býkmekerlik lotoklýbqa 1 retten qaraqshylyq shabýyl jasalǵan. Osy jáne jeke adamdarǵa jasalǵan qaraqshylyq derekterine baılanysty kúdiktileri izin sýytpaı ustalyp, qamaýǵa alyndy. Kúdiktilerge qatysty QR Qylmystyq kodeksiniń 191-babymen (Tonaý) sotqa deıingi tergeý júrgizildi», -dep habarlady departamenttiń baspasóz qyzmeti.

Qazir Atyraýdaǵy Qylmystyq-atqarý júıesi departamentine qaraıtyn №66 túzetý mekemesinde qaraqshylyq deregimen 33 sottalýshy jazasyn ótep júr. Onyń ishinde Atyraý oblysynan 18, Mańǵystaýdan — 14, Jambyl oblysynan 1 sottalýshy bar. Sottalýshylar 1 jyldan 14 jylǵa deıin bas bostandyǵynan aıyrylǵan.

Eske sala ketelik, buǵan deıin Atyraý túrmesinde esirtki qylmysymen sottalǵan 33 áıel jazasyn ótep júrgenin jazǵan bolatynbyz.