Atyraýdaǵy tasqyn sý qorshaǵan Taldykól aýylynda 300-ge jýyq turǵyn qalǵan
Mahambet aýdanyndaǵy Beıbarys aýyldyq okrýginiń ákimi Seıilbek Zulqashevtiń aıtýynsha, tasqyn sý Taldykól eldi mekenin qorshap tur.
«Atyraý-Oral trassasynan Taldykól aýylyna kiretin 7 shaqyrym joldyń eki jaǵyna tasqyn sý shyqty. Ázirge atalǵan jolmen kóliktiń júrýine shekteý qoıylǵan joq. Biraq, sý basý qaýpine baılanysty 13 mamyrdan beri aýyl turǵyndary evakýatsııalandy. Qazir aýylda 1215 turǵynnyń 300-ge jýyǵy qaldy. Olardyń deni – er adam», -dedi Seıilbek Zulqashev.
Ákimniń aıtýynsha, aýyl mańyna 3 shaqyrym bóget salynǵan. Bógetti qosymsha nyǵaıtý jumysyna 80-ge jýyq adam tartylǵan. Onyń ishinde 30 ásker, tótenshe jaǵdaılar salasynyń 25 mamany, jergilikti atqarýshy organnyń qyzmetkerleri men aýyl eriktileri bar.
«Qazir aýylda sý, jaryq, gaz turaqty berilip tur. Biraq, sý tazartý qondyrǵysynyń aınalasyna ózen boıymen aǵyp kelgen aǵash qaldyǵy jınalyp qalady. Ony kún saıyn tótenshe jaǵdaılar departamenti mamandarynyń kómegimen jınap júrmiz. Sý tazartý qondyryǵysyna deıin qaıyqpen baramyz», -dedi Seıilbek Zulqashev.
Eske sala ketelik, budan buryn Atyraý polıtseıleri turǵyndary evakýatsııalanǵan Taldykól aýylyn táýlik boıy baqylaýǵa alǵanyn habarlaǵan bolatynbyz.