Atyraýdaǵy sý tasqyny: Qyzylqoǵa aýdanynda otbasyǵa jańa baspana berildi

<p>ATYRAÝ. KAZINFORM &ndash; Atyraý oblysynyń Qyzylqoǵa aýdanynda kóktemgi sý tasqynyna kezinde 24 otbasynyń baspanasy búlingen. Alaıda, olardyń deni ótemaqy alýdy uıǵarǵan.</p>

Qyzylqoǵa aýdanynyń ákimi Qanat Ázmuhanovtyń aıtýynsha, Oıyl ózeniniń sýy arnasynan asqan kezde qystaqtaǵy turǵyn úılerge zaqym kelgen. 

«Kóktemgi sý tasqyny aýdan turǵyndaryn úlken ábigerge saldy. Sol kezde turǵyndar uıymshyldyq pen birliktiń úlgisin kórsetti. Sonyń nátıjesinde aýdandaǵy eldi mekenderdi tasqyn sý basqan joq. Degenmen, aýdanda sý tasqynynan 24 úı búlindi. Biraq, búlingen úıler eldi mekende emes, kóbi qystaqta ornalasqan. Úı ıeleri aýdandyq komıssııaǵa ózderiniń ótinishin berdi. Soǵan sáıkes 20 otbasy ótemaqy alýǵa, 4 adam jańa turǵyn úı salyp berýdi surady», - deıdi Qanat Ázmuhanov.

Aýdan ákiminiń málimetinshe, turǵyndardyń ótinishimen Kózdiqara aýylynda jańadan 4 úı salynǵan. Ár úıdiń jalpy aýdany – 128 sharshy metr. Jańa baspanalarǵa ınfraqurylym jelileri júrgizilgen. 

«Búgin 4 otbasy ózderiniń qalaýymen salynǵan jańa úıge qonystandy. Al, 20 otbasyna sý tasqynynan búlingen úıi úshin tıisti ótemaqy tolyq tólendi», -dep málim etti Qanat Ázmuhanov. 

Eske sala ketelik, budan buryn Atyraýdyń Reseımen shekaralas aýdanynda apatty úı turǵyndary jańa baspanaǵa kóshkenin habarlaǵan edik.