Atyraýdaǵy sibir jarasynan keıin bazardaǵy et pavılony birneshe kúnge jabyldy

<p>ATYRAÝ. KAZINFORM &ndash; Atyraýdaǵy &laquo;Asyl-Agro&raquo; sharýa qojalyǵynyń mal soıý pýnktinde ólgen sıyrdan tabylǵan sibir jarasynyń sarsańy áli basylmaı tur. Munaıly shaharda ornalasqan &laquo;Dına&raquo; bazarynyń et satatyn pavılony birneshe kúnge jabyldy.&nbsp;</p>

Atyraý oblystyq sanıtarııalyq-epıdemıologııalyq baqylaý departamenti basshysynyń orynbasary Altyngúl Aımuratovanyń aıtýynsha, osy kezge deıin 65 saýda núktesi tekserilgen. Atap aıtqanda, saýda oryndaryndaǵy pavılondar men et satatyn dúkenderden 700-den astam synama alynǵan. 

Oblys ákiminiń baspasóz qyzmeti usynǵan aqparatqa qaraǵanda, Atyraý qalasyndaǵy saýda oryndaryn qaıtalap tekserý kezinde bazarlardyń birinde sibir jarasy belgileri anyqtalǵan. Ekspress-testten aýrý belgileriniń bar ekeni rastalǵan. 

Osyǵan baılanysty Atyraý qalalyq bas sanıtar dárgerdiń qaýlysyna sáıkes, bazardyń et pavılony dezınfektsııalyq sharalardy júrgizý úshin shuǵyl jabylǵan. 

Atyraý oblystyq sanıtarııalyq-epıdemıologııalyq baqylaý departamenti basshysynyń orynbasary Altyngúl Aımuratovanyń málimetinshe, «Dına» bazaryndaǵy et pavılonynda 54 saýda núktesi bar. Al, 65 adam dárigerlerdiń baqylaýyna alynǵan. 

Qaıta tekserý kezinde alynǵan synamalar respýblıkalyq sanıtarlyq-epıdemıologııalyq saraptama ortalyǵyna jiberildi. Zertteýdiń sońǵy nátıjeleri birneshe kúnnen keıin belgili bolady. Qazir atalǵan derekke qatysty epıdemıologııalyq tekserý júrip jatyr. 

Eske sala ketelik, buǵan deıin Atyraýdaǵy qasaphana jumysshysy sibir jarasynyń jeńil túrin juqtyrǵanyn habarlaǵan edik. Birneshe kúnnen keıin qasaphananyń taǵy bir jumysshysynan aýrý belgisi tabyldy.