Atyraýdaǵy sibir jarasy: Qasaphana jumysshysy aýrýdyń jeńil túrin juqtyrǵan
Atyraý oblystyq densaýlyq saqtaý basqarmasynyń medıtsınalyq qyzmet kórsetý basshysynyń orynbasary Almagúl Ábilovanyń aıtýynsha, 22 qarashada qasaphana jumysshysy №2 oblystyq aýrýhanaǵa sibir jarasynyń bastapqy belgilerimen jetkizilgen.
«Naýqastyń qolyndaǵy jaraqattan PTsR synamasy alyndy. Zerthanalyq taldaý oń nátıje berdi. Naýqasqa sibir jarasynyń terilik dıagnozy qoıyldy», - dep habarlady Almagúl Ábilova.
Onyń pikirinshe, ólgen malmen baılanysta bolǵan 16 adam medıtsına qyzmetkerleriniń baqylaýyna alynǵan. Olardan sibir jarasyn juqtyrý belgileri baıqalmaǵan.
«Sibir jarasynyń birneshe formasy bar. Bul aýrý maldan adamǵa qol men aıaqtyń ashyq jeri arqyly juǵady. Onyń belgileri 14 kún ishinde nemese 5-6 kúnde anyqtalady. Atalǵan aýrýdy juqtyrý belgisi rastalǵan naýqasqa sibir jarasynyń terilik formasy degen dıagnoz qoıyldy. Bul – jeńil ótetin forma túri. Qazir naýqastyń dene qyzýy qalypty, densaýlyq jaǵdaıy qanaǵattanarlyq. Medıtsınalyq hattamaǵa sáıkes antıobıotık terapııamen emdelýip jatyr», - dedi Almagúl Ábilova.
Eske sala ketelik, buǵan deıin ótken aptada Atyraýdaǵy mal bazarynda ólgen sıyrdan sibir jarasy anyqtaldy. Al, juma kúni mal bazarynda jumys isteıtin bir adam aýrýhanaǵa túskenin habarladyq.
Sondaı-aq búgin aýrýhanada jatqan bazar jumysshysynan aýrý belgisi rastaldy.