Atyraýdaǵy sibir jarasy: Aýrýhanada jatqan bazar jumysshysynan aýrý belgisi rastaldy

<p>ATYRAÝ. KAZINFORM — Ótken aptada Atyraýdaǵy mal satatyn bazarda ólgen sıyrdan sibir jarasy anyqtalyp, qasaphanada jumys isteıtin bir adam aýrýhanaǵa túsken edi. Aýrýhanada jatqan adamnyń sibir jarasyn juqtyrǵany rastaldy.</p>

Atyraý oblysy ákiminiń baspasóz hatshysy Rýslan Jumaǵazıevtiń aıtýynsha, «Asyl-Agro» sharýa qojalyǵynyń mal soıý pýnkti aýmaǵynda 20 qarashada karantın engizildi. Oǵan ólgen sıyrdan sibir jarasynyń anyqtalǵany sebep bolǵan. 

«Zerthanalyq taldaý nátıjeleri boıynsha mal soıý pýnktiniń bir jumysshysynan teri sibir jarasy dıagnozy rastaldy. Naýqas aýrýhanada jatyr. Oǵan bekitilgen medıtsınalyq hattamaǵa sáıkes emdeý júrgizý qolǵa alyndy. Qazir onyń jaǵdaıy turaqty. Ózge adamdardan aýrýdyń belgileri baıqalmady», — dep habarlady Rýslan Jumaǵazıev.

Onyń aıtýyna qaraǵanda, ınfektsııa oshaǵynda sanıtarlyq jáne veterınarııalyq normalarǵa sáıkes jumystardy júrgizý jalǵasyp jatyr.

«Veterınarııalyq baqylaý mamandary karantındik aýmaqta turǵan maldyń barlyǵyn tolyq vaktsınatsııalaýdy aıaqtady. Bul aýmaqta dezınfektsııalaý jumystary júrgizilip jatyr. Sibir jarasy aýrýynyń anyqtalýyna baılanysty Atyraý oblysyna iri qara mal ákelýdi baqylaý úshin tórt polıtsııa jáne veterınarlyq baqylaý beketi ornatyldy. Mal ákelýshilerden egý júrgizilgenin rastaıtyn qujattar tekserilip, maldyń jaǵdaıy tekserilip, termometrııa júrgizilýde. Sanıtarlyq qaýipsizdik maqsatynda osyndaı sharalar Atyraý qalasyndaǵy mal soıý pýnktterinde de uıymdastyryldy. Veterınarııalyq qujattarsyz maldy tasymaldaýǵa jáne soıýǵa qatań tyıym salyndy», — dep málim etti Rýslan Jumaǵazıev.

Eske sala ketelik, budan buryn Atyraýdaǵy mal bazarynda ólgen sıyrdan sibir jarasy anyqtalǵanyn jazǵan edik. 

Keıin mal bazarynda jumys isteıtin bir adam aýrýhanaǵa túskenin habarlaǵan bolatynbyz.