Atyraýdaǵy Saryózek kanaly mańynan 9 sharýa qojalyǵy qaýipsiz aýmaqqa kóshiriledi
Atyraý oblysy jedel shtabynyń aqparatyna súıensek, tasqyn sýǵa qarsy jumys birneshe ýchaskede jalǵasyp jatyr. Al, Saryózek kanaly 107-ýchaske retinde belgilengen. Atalǵan ýchaskeniń úılestirýshisi Qadyrjan Sııýmovtyń aıtýyna qaraǵanda, kanal mańyndaǵy aýyldardyń qatarynda Bestal eldi mekeni de bar. Tasqyn sý qaýpiniń aldyn alý úshin mal jáne egin sharýashylyǵymen aınalysatyn turǵyndarǵa qaýipsiz aýmaqqa kóshý týraly eskertý berilgen.
«Saryózek kanalynyń Erkinqala aýyldyq okrýgi aýmaǵyndaǵy jaǵalaýyna taıaý mańda 30 sharýa qojalyǵy ornalasqan. Onyń ishinde Bestal aýylynda 15 sharýa qojalyǵy tirkelip otyr. Tótenshe jaǵdaı jarııalanǵan kezden beri 6 sharýa qojalyǵy malyn qaýipsiz aýmaqqa malyn kóshirip áketti. Al búgin 9 sharýa qojalyǵynyń jetekshilerine túsindirý jumysy júrgizilip, turǵyndar men maldy qaýipsiz aýmaqqa kóshirý usynyldy», - dep habarlady kanalyna jaýapty maman Qadyrjan Sııýmov.
Onyń aıtýynsha, Jaıyq ózenimen aǵyp kelgen tasqyn sý Saryózek kanalymen Kaspıı teńizine quıylýǵa tıis. Sýdyń kedergisiz aǵýyna jola ashý úshin qoqys jınalyp jatyr.
Eske sala ketelik, budan buryn Tasqyn sý Atyraý mańyndaǵy Sokolok kanalynyń bógetin buzyp ketkenin habarlaǵan bolatynbyz.