Atyraýdaǵy órtte kúıip qalǵan úsh aılyq sábı aýrýhanada kóz jumdy
Búgin bul derekti oblystyq densaýlyq saqtaý basqarmasynyń baspasóz qyzmeti rastady.
«Keshe, 5 qańtarda keshki mezgilde oblystyq balalar aýrýhanasynda 2023 jylǵy sábı kóz jumdy. Qazir aýrýhananyń jansaqtaý bóliminde kúıik shalǵan taǵy bala jatyr», -dep habarlady basqarmanyń baspasóz qyzmeti.
Budan buryn habarlaǵanymyzdaı, 2 qańtarda Atyraý qalasyndaǵy Kókarna aýylyndaǵy turǵyn úıde gaz-aýa qospasy jarylyp, sońy órtke ulasqan edi.
Onyń saldarynan bir otbasynyń 5 adamyn kúıik shalǵan. Zardap shekkenderdiń bári 80-95 paıyz kúıikpen aýrýhananyń jansaqtaý bólimine tústi.
Turǵyn úıdiń 9 sharshy metr qabyrǵasy qulap, 140 sharshy metr alańy janyp ketti.
Densaýlyq saqtaý basqarmasynyń baspasóz qyzmetinen málim etkendeı, aýrýhanaǵa túsken bes adamnyń úsheýi — eresek, ekeýi — balalar.
Úsh kún buryn, 3 qańtarda 1965 jylǵy er adam oblystyq aýrýhananyń jansaqtaý bóliminde kóz jumdy.
Bir kúnnen soń, 4 qańtarda jarylysta kúıip qalǵan ekinshi adam aýrýhanada qaıtys boldy. Ol — 1970 jylǵy áıel.
Marqumdardyń denesin 90-95 paıyz shamasynda kúıik shalǵan.
Burnaǵy kúni, 4 qańtarda Atyraýdaǵy jarylystan zardap shekken eki balanyń jaǵdaıy áli de aýyr ekenin habarlaǵan bolatynbyz.
Atyraý oblystyq balalar aýrýhanasy dırektorynyń emdeý isi jónindegi orynbasary Erjan Esbolaevtyń aıtýynsha, eki bala jansaqtaý bóliminde óte aýyr jaǵdaıda jatyr.
«Bizdiń aýrýhanaǵa 2 qańtar kúni jergilikti ýaqytpen saǵat 11:00 shamasynda eki bala óte aýyr jaǵdaıda tústi. Balaqaıdyń biri 2021 jyly týǵan, al, ekinshisi — úsh aılyq eki bala. Ekeýiniń denesinde 80-90 paıyz shamasynda kúıik bar. Balalar jasandy tynys alý qurylǵysyna shuǵyl qosyldy. Jergilikti dárigerler naýqastarǵa tıisti em-dom júrgizýde. Biraq, oń ózgeris baıqalǵan joq. Balalardyń jaǵdaıy áli de burynǵysha — aýyr kúıde qalyp otyr. Olardyń ómirin saqtap qalý úshin elordalyq dárigerlerdiń keńesine júgindik», — dep habarlaǵan edi Erjan Esbolaev.